«Ռեալը» մտնում է մրցաշրջանի վերջին հատված՝ մտքում պահելով տիտղոսներ նվաճելու հեռանկարը

«Ռեալը» մրցաշրջանի վերջին հատված է մտնում բավականին լավ մարզավիճակով։ «Արքայական» ակումբը միջազգային դադարից առաջ կարևոր հաղթանակներ տարավ, որի շնորհիվ Զինեդին Զիդանի թիմը դուրս եկավ Չեմպիոնների լիգայի քառորդ եզրափակիչ, իսկ Լա լիգայում շարունակում է սեղմել առաջատար «Ատլետիկոյին» ու «Բարսելոնային»։

Զինեդին Զիդանը ևս մեկ անգամ փոխում է ամեն բան։ Երբ մրցաշրջանի միջնամասում նրա հասցեին տարաբնույթ մեկնաբանություններ ու քննադատություններ էին հնչում, ֆրանսիացին ուղղակի լուռ աշխատում էր ու իր թիմին տանում առաջ։ Հիմա ակնհայտ է, որ «Ռեալը» բավականին լավ մարզավիճակում է, ու սա ոչ միայն խաղայինի, այլ նաև հոգեբանականի մասին է։

«Ատալանտայի» հետ խաղից հետո իսպանական լրատվամիջոցներից մեկը հայտնել էր, որ «Ռեալի» խաղացողները հանդիպումից հետո ասել են միմյանց, որ եթե այսպես խաղան ամբողջ մրցաշարում, ապա կարող են հաղթել Չեմպիոնների լիգայում։ Եթե այդտեղ ամեն ինչ կախված է «Ռեալից», ապա առաջնությունում դա այդքան էլ այդպես չէ։

«Ռեալը» պետք է սպասի «Ատլետիկոյի» սայթաքումներին, իսկ «Բարսելոնայի» հետ հարցերը կարող է լուծել առաջիկա կլասիկոյի ժամանակ։ Մեկ բան ակնհայտ է․ ձախողված թվացող մրցաշրջանի վերջին հատված «Ռեալը» մտնում է՝ մտքում պահելով Չեմպիոնների լիգայում ու Լա լիգայում հաղթելու հեռանկարը։