Դասականությունը ո՞ւր կտանի Էդմոն Մարուքյանին

 Արտահերթ խորհրդարանական ընտրությունները իրողություն դարձնելու գործում ակտիվ դերակատարություն և ազդեցություն ունեցավ «Լուսավոր Հայաստան» կուսակցության առաջնորդ Էդմոն Մարուքյանը։ Դրա համար Մարուքյանին քննադատում և քարկոծում էին թե իշխանությունները և թե ընդդիմադիրները։ Եվ առհասարակ Մարուքյանն այն եզակի գործիչներից է, որը հաճախ է թիրախավորվում քաղաքական դաշտի 2 բևեռների կողմից։

Խնդիրն այն է, որ Մարուքյանի և նրա ղեկավարած ուժի քաղաքական գործունեության առանձին կարևորագույն դրվագներ գերազանցապես դասական քաղաքականության տրամաբանության և բովանդակության տիրույթում են իրականացվում։ Հայաստանյան քաղաքական դաշտի բազմաթիվ դերակատարների համար դասական քաղաքականությամբ զբաղվելը խորթ է, հետևաբար Մարուքյանի գործողությունները և մոտեցումները հաճախ սվիններով են ընդունվում, սակայն հետագայում պարզվում է, որ Էդմոնի մոտեցումներն էին ճիշտ։

Արտահերթ ընտրությունների հետ կապված թնջուկը բացառություն չէ, որովհետև նոր ընտրությունների անհրաժեշտություն միանշանակ կա՝ ոչ միայն թոթափելու երկրում առկա քաղաքական ճգնաժամը, այլև երկիրը զարգացման ռելսերի վրա դնելու համար։

Ինչևէ, վերջին ընտրություններում շոշափելի հաջողություն արձանագրած «Լուսավոր Հայաստան» կուսակցությունը հնարավորություն ունի առաջիկա ընտրություններում ամրապնդել այդ հաջողությունը, եթե նրա դիրքավորումը քաղաքական դաշտում հասու և հասկանալի դառնա հանրության ավելի մեծ շերտերին։ Ակնհայտ է, որ հաջորդ կառավարությունը պետք է լինի ճգնաժամային իրավիճակներ հաղթահարել կարողացող պրոֆեսիոնալների կառավարություն, հետևաբար «Լուսավոր Հայաստանը»` իշխանության հասնելու կամ դրա մաս կազմելու պարագայում, կարող է ցուցադրել և իրացնել իր ողջ պոտենցիալը։ Իսկ այն, որ «Լուսավոր Հայաստանը» մեծ պոտենցիալ ունի, փաստ է։ Այդուհանդերձ, քաղաքական դաշտի դերակատարներն ընտրություններից առաջ ակտիվ դիրքավորվում են։ Թե ինչ պատկեր կունենա առաջիկա խորհրդարանը, կորոշեն ՀՀ քաղաքացիները։ Սակայն, մեկ բան պարզ է՝ հայ ժողովուրդը ընտրություն չի կատարելու նախկին և ներկա իշխանությունների սիմբիոզի արդյունքում առաջացած այլընտրանքների միջև։

Կարեն Վրացյան

Pressmedia.am