Պայքար հրաժարականի համար. ի՞նչի կբերի Հայաստանի քաղաքական ճգնաժամը

Iz.ru-ն գրում է, որ որքան գնում, այնքան խորանում է դառնում հայկական քաղաքական ճգնաժամը: Վարչապետ Նիկոլ Փաշինյանը կարծում է, որ իրեն հաջողվել է փոխարինել բանակի գլխավոր շտաբի պետին: Ընդդիմախոսները վիճարկում են դա, իսկ ընդդիմության ակտիվիստները արդեն երկու շաբաթ քնում են վրաններում՝ Երևանի կենտրոնում: Իրավիճակի կարգավորման հեռանկարները դեռ մշուշոտ են:

Փորձագետները ներկայիս իրավիճակը փակուղային են անվանում: «Ես ներկա ճգնաժամի լուծում չեմ տեսնում: Թերևս կօգներ երկրի նախագահի ավելի հստակ դիրքորոշումը, բայց նա, ըստ երևույթին, փորձում է մեղմել իրավիճակը, բայց արդյունքում ավելի է շփոթեցնում այն»,- «Իզվեստիա»-ի հետ զրույցում ասել է ՄԳԻՄՈ-ի Կովկասյան խնդիրների և տարածաշրջանային անվտանգության կենտրոնի առաջատար հետազոտող Նիկոլայ Սիլաևը: Քաղաքագետ Արթուր Աթաևն էլ կարծում է, որ Հայաստանը չի կարող ինքնուրույն հաղթահարել քաղաքական ճգնաժամը:

«Հայկական էլիտան ի վիճակի չէ քանդել ներքին հակասությունների խառնաշփոթը: Անցել է այն փուլը, երբ կողմերը կարող էին համաձայնության գալ միմյանց միջև: Ընդդիմությունն այլևս չի ընդունի Փաշինյանի ընդառաջելու քայլերը: Հայաստանին ամենաբարձր մակարդակի քաղաքական միջնորդություն է պետք»,- նշել է նա: Զրուցակիցը հավելել է, որ հարևան Վրաստանը կարող էր հավակնել միջնորդի դերին, բայց այնտեղ ևս ներքին քաղաքական ճգնաժամ է: Երկրորդ հավակնորդը հայկական սփյուռքն է, սակայն խանգարում է մեկ միասնական առաջնորդ քաղաքական անձի բացակայությունը: «Իհարկե, Ռուսաստանը լավագույնս կկարողանա կատարել միջնորդի դերը: Մոսկվան լավ կապեր ունի հայկական ներքին քաղաքական շրջանակների հետ, նա նաև փորձ ունի նման իրավիճակները լուծելու գործում», - եզրափակել է Աթաևը:


Կարինե Սիմոնյան

Pressmedia.am