Իշխանությունը դժգոհելու և տրտնջալու փոխարեն պետք է անհրաժեշտ փոփոխություններն իրականացներ

Նախագահ Արմեն Սարգսյանը ՍԴ է դիմել «Զինվորական ծառայության և զինծառայողի կարգավիճակի մասին» օրենքի՝ Սահմանադրությանը համապատասխանելու հարցը որոշելու խնդրանքով, նախագահը նաև չի ստորագրել Արտակ Դավթյանին ԳՇ պետ նշանակելու հրամանագիրը: Այս թեմայով pressmedia.am  կայքը  զրուցել է իրավապաշտպան Արթուր Սաքունցի հետ։ 

— Պարոն Սաքունց, ինչպե՞ս եք գնահատում ստեղծված  իրավիճակը։

— Օրենքի սահմանադականության հարցը պետք է ՍԴ-ն որոշի, նորմալ է, որ նախագահը  դիմում է ՍԴ, դրանով նախագահը իրականացնում է իր  սահմանադրական լիազորությունները։ Իսկ Արտակ Դավթյանի դեպքում ես ծանոթ չեմ, թե ինչ առարկություններ է ներկայացվել վարչապետին և այդ մասով  կարծիք չեմ հայտնի, պարզապես խնդիրը այն է, որ անհատական անձանց պաշտոնի նշանակելու հետ կապված նախկինում երբևէ  նման դեպք չի եղել, երբ նախագահը առարկություններ է ունեցել։ 

— Օնիկ Գասպարյանը իրեն ազատելու որոշումը բողոքարկել է վարչական դատարանում: Ի՞նչ շանսեր ունի։

— Չեմ կարող եզրակացություններ անել, բայց կարևոր է այն, որ վերջնահաշվով դիմում է իրավական գործընթացների։

— Իշխանություններն անընդհատ նշում են, որ դատական համակարգը նախկիններին է ենթարկվում, որ արդար դատական վճիռներ չեն կայացվում: Եթե վարչական դատարանը հօգուտ Օնիկ Գասպարյանի վճիռ կայացնի, ինչպե՞ս դա կորակվի։

— Գիտեք, անկախ նրանից, թե դատարանը ինչպիսի  որակ ունի,  դատարանի որոշումը օրենքի ուժ ունի և պետք է դատարանի որոշումը ի կատար ածվի։ Իսկ ինչ վերաբերվում է, թե ինչ հարցով է կամ ինչ հիմնավորմամբ է Օնիկ Գասպարյանը իր դիմումը ներկայացրել, տեղյակ չեմ, որ դատողություն անեմ։ Պարզապես խնդիրը այն է, որ իշխանությունը փոխանակ դժգոհելու կամ տրտնջալու  դատական համակարգի  անմխիթար վիճակից, որը իրապես համապատասխանում է իրականությանը և դա վաղուց էր արձանագրված, մինչև  հեղափոխությունն էլ և հեղափոխությունից հետո, պետք է անհրաժեշտ փոփոխություններն իրականացներ և դրանց ուղղված իրավական մեխանիզմներ՝ արմատական վեթինգի իրականացմամբ, դրանից հետո՝ բարեփոխությամբ և այլն։ Ումի՞ց են դժգոհում։

Արմեն Սիմոնյան

Pressmedia.am