Պետք է համախմբվել ոչ թե խոստումների, այլ գաղափարների շուրջ

«Թովմասյան հիմնադրամի» հոգեբարձուների խորհրդի նախագահ Արտակ Թովմասյանը խոսել էր քաղաքական երրորդ բևեռ  ստեղծելու մասին։ Այդ գաղափարը  որջունել էր կինոռեժիսոր, սցենարիստ Արշակ Զաքարյանը, ով դարձել է այդ նախաձեռնության առանցքային դեմքերից մեկը։ Այդ  թեմայով pressmedia.am  կայքը զրուցել է Արշակ Զաքարյանի հետ` պարզելու համար, թե որն է երկրի արմատական զարգացման նրանց տեսլականը։

— Պարոն Զաքարյան, դուք մի քանի օր առաջ ողջունել էիք երրորդ բևեռ ստեղծելու գաղափարը, ինչի մասին օրեր առաջ հայտարարեց «Թովմասյան հիմնադրամի» հոգաբարձուների խորհրդի նախագահ Արտակ Թովմասյանը։ Հայտնի է, որ դուք այդ շարժման առանցքային դեմքերից եք։ Պարոն Զաքարյան, քաղաքական ո՞ր հարցերի շուրջ համընկան ձեր հայացքները, և ո՞ր ուղղություններով են երկրի զարգացման ձեր տեսլականը։ 
 
— Մեր հայացքները համընկել են մի բանում, որ մենք գտնում ենք, որ պետք է համակարգային փոփոխություն լինի երկրում, ոչ թե դեմքերի կամ անձերի փոփոխություն։ Դա ամենաառանցքային և կարևոր համընկնումն է, քանի որ մենք գտնում ենք, որ  երեսուն տարի համակարգային փոփոխության բացակայությունն է հենց պատճառը, որ երկիրը հասել է այսօրվան։ Այսինքն, երկրի այսօրվա իրավիճակում գտնվելու պատասխանատվությունը  հենց ամբողջ երեսուն տարվա կառավարության վրա է։ Այդ պատճառով էլ կարծում ենք, որ պետք է արմատական բարեփոխումներ լինեն, որ կարողանանք դուրս գալ այս ճգնաժամից, որը, ինչպես ասում եմ, եղել է երեսուն տարվա լավ կամ վատ կառավարման արդյունքում, տեսնում ենք այն արդյունքը, որը բերել է այսօրվա իրավիճակին։ Եվ եթե չլինեն համակարգային փոփոխություններ, և եթե էլի հույս դնենք այս կամ այն անձի փոփոխությունով հարց լուծելուն,ապա ոչ միայն ճգնաժամից դուրս չենք գա, այլ ավելի խորը ճգնաժամի մեջ կհայտնվենք։ 

—  Դուք, որպես այդ նախաձեռնության առաջամարտիկներից մեկը, արդյո՞ք արդեն ունեք ձեր քաղաքական ծրագիրը։ 

— Քաղաքական ծրագրի մասին խոսելը դեռ վաղ է, քանի որ սա քաղաքացիական նախաձեռնություն է, քաղաքացիական նախաձեռնությունը, ինչպես հայտարարվել է, արդեն բաց է,  և այդ քաղաքացիական բաց հավաքների, ժողովների, ճանապարհային քարտեզի, քննարկումների և ընդհանուր գիծը գտնելու և ընդհանուր ծրագրի հետ համաձայնեցնելու արդյունքում  միայն կարելի է խոսել քաղաքական հայտի մասին։ 

— Դուք, որպես այդ նախաձեռնության առանցքային դեմքերից մեկը , կարող եք նշել, թե հասարակության ո՞ր հատվածն է աջակցում ձեր շարժմանը։

— Հասարակության մեջ ձևավորված մի կարծիք կա, որ ներկաներին չեն ուզում, հներին էլ հետ բերել չեն ուզում, այդպիսի ընդունված խոսք կա։ Ոմանք դա ասում են հասկանալով, ոմանք ասում են, որովհետև ուղղակի այդպես ասելը հիմա մոդա է։ Բայց մենք գտնում ենք, որ երկրի զարգացումը, ոչ միայն տնտեսական, այլ, առհասարակ, բոլոր ոլորտներում  հնարավոր է միայն հենց համակարգային և խորը, արմատական փոփոխությունների դեպքում։ Եվ մեր մոտեցումն էլ, ինչպես արդեն  առաջին հարցի ժամանակ ասեցի, հենց դա է, որ մենք պետք է աշխատենք նոր համակարգի, նոր զարգացման ծրագրերի  կոնկրետ ձևավորմամբ։ Այսօր ասում են, որ Նիկոլ Փաշինյանը պետք է գնա, բայց որ  նայում ենք, կոնկրետ ծրագիր, թե հետո  ինչ են տեսնում՝ չկա։ Հասարակության այդ մեծ զանգվածը, ովքեր դեռ չեն կողմնորոշվել,  հենց այդ զանգվածն է մեր հույսը, այդ զանգվածը գիտակից զանգվածն է,  և նրանք ոչ թե խոսքերին են հավատալու, այդ խոստումներին, որ արդեն երեսուն տարի է խոստումներ տալիս են, այլ ընկալելի, հասկանալի և ընդունելի ծրագիր կներկայացվի, որը որ այդ գիտակից զանգվածը կտեսնի, կհասկանա  իրականացնելիք ծրագիրը և այդ ժրագրին կմիանան։ Ոչ թե  ձայն կտան այս կամ այն անձին, այլ ներկայացված ծրագրին։ 

Սուրեն Ավագյան

Pressmedia.am