Ալիևը իր հայտարարությամբ շանտաժի է ենթարկում Հայաստանին

Ադրբեջանի նախագահ Իլհամ Ալիևը հայտարարել է, որ բոլոր հայ գերիներին վերադարձրել է, իսկ նրանք, որոնք մնացել են՝ դիվերսանտներ են, որոնց չի պատրաստվում վերադարձնել: Այս թեմայով pressmedia.am  կայքը զրուցել է միջազգային իրավունքի մասնագետ Սուրեն Սարգսյանի հետ՝ պարզելու համար, թե ինչ կարող ենք անել այս պայմաններում։ 

— Պարոն Սարգսյան, Ալիևը  իր այս հայտարարությամբ արդյո՞ք կտրուկ մերժում է վերադարձնել հայ գերիներին և փակում այս թեման:

— Իհարկե, սա առաջին հերթին մերժում է նշանակում, երկրորդ հերթին՝  շանտաժ է նշանակում Հայաստանի նկատմամբ և սա միակ շանտաժի ձևը չէ, որ Ալիևը կիրառում է, նման շանտաժի մեխանիզմ է նաև եղել թուրք-ադրբեջանական ռազմական զորավարժությունները։ Սա շարունակական պրոցես է, շարունակական գործընթաց է։ Եվ,  այո, Ալիևը մերժում է և շանտաժի է ենթարկում Հայաստանին՝ ակնկալելով ինչ-ինչ  լրացուցիչ զիջումներ այս կամ այն  ուղղություններով։ 

— Այս իրավիճակը փակուղային չէ՞:

— Փակուղային իրավիճակ, կարծում եմ, կարող է չլինել, եթե  մենք կարողանանք ճիշտ աշխատել, և ներառենք նաև միջազգային խոշոր խաղացողներին այս հարցի մեջ։ Կարծում եմ, որ եթե մեր իշխանությունները  որոշեն դիմել համաշխարհային  առաջնորդներին, ապա այս հարցում որևէ տեղաշարժ կարող է լինել, ես դրա մասին բազմիցս խոսել եմ, բայց այս պահի դրությամբ կարծես նման հեռանկար չկա։

— Միջազգային ի՞նչ ճնշումների դեպքում մյուս գերիները կվերադարձվեն Հայաստան, և հայկական կողմը այս պարագայում ի՞նչ կարող է անել։

— Ինչպես արդեն նշեցի, պետք է դիմել հեղինակավոր գործիչներին, տարբեր պետությունների ղեկավարներին՝ ԱՄՆ-ի նախագահին, ՄԱԿ-ի գլխավոր քարտուղարին անձամբ միջնորդել, որ նրանք էլ իրենց հերթին անձամբ միջնորդեն Ալիևին գերիներին վերադարձնելու հարցում։

Ալինա Սիմոնյան

Pressmedia.am