«Ատալանտայի» մարզիչ. Սա ինքնասպանություն է ֆուտբոլի համար

Իտալական «Ատալանտայի» գլխավոր մարզիչ Ջան Պյերո Գասպերինին մեկնաբանել է Չեմպիոնների լիգայի 1/8 եզրափակիչի առաջին խաղում Մադրիդի «Ռեալից» կրած տնային պարտությունը նվազագույն հաշվով: Արքայական ակումբը թվային առավելություն էր ստացել 17-րդ րոպեին, երբ դաշտից հեռացվել էր «Ատալանտայի» շվեյցարացի կիսապաշտպան Ռեմո Ֆրոյլերը:

«Կլիներ այլ հանդիպում, եթե խաղայինք 11-ը 11-ի դեմ: Խաղը պարզապես քանդվեց: Նախորդ մրցաշրջանում, մեծ քաոսից հետո, լուծվեց ձեռքով խաղի կանոնի հարցը: Հիմա կա ֆուտբոլում ցանկացած կոնտակտ հեռացնելու գայթակղություն, և դա ինքնասպանություն է սպորտի համար: A Սերիայում ինձ որակազրկեցին այն բանի համար, որ ես ինչ-որ բան ասացի: Եթե հիմա ասեմ ինչ-որ բան, ՈւԵՖԱ-ին ինձ կորակազրկի մեկ ամսով: Սակայն դա ինքնասպանություն է ֆուտբոլի համար:

Պետք է չունենանք մրցավարներ, որոնք երբեք չեն խաղացել ֆուտբոլ ու չեն հասկանում գնդակ խլելու ու կանոնների խախտման տարբերությունը: Եթե նրանք չեն հասկանում դա, ապա պետք է փնտրեն այլ աշխատանք: Նրանց փոխարեն պետք է աշխատեն այն մրցավարները, որոնք ֆուտբոլ են խաղացել:

Դու այդքան երկար սպասում ես այդ երեկոյին, իսկ հետո այն ձախողվում է: Ես չեմ դժգոհում արդյունքից, ամեն դեպքում պարտվեցինք, սակայն կարող էինք գոնե խաղալ մեր ֆուտբոլը»,- իտալացի մասնագետի խոսքը մեջբերում է Football Italia-ն:

Հիշեցնենք, որ դա Արքայական ակումբի մրցակիցների 15-րդ կարմիր քարտն էր Չեմպիոնների լիգայի փլեյ-օֆֆում: Այդ ցուցանիշով մադրիդցիներն առաջին տեղը կիսում են կատալոնական «Բարսելոնայի» հետ:

«Ռեալի» ու «Ատալանտայի» միջև պատասխան հանդիպումը կանցկացվի մարտի 16-ին Մադրիդում: