Չիլիացի նախկին զինվորին կալանավորել են Պինոչետի ժամանակ մահապատիժներին մասնակցելու խոստովանությունից հետո

Չիլիի ոստիկանության աշխատակիցները ձերբակալել են նախկին զինվորականին, որը ռադիոեթերի ժամանակ խոստովանել է, որ Աուգուստո Պինոչետի հեղաշրջումից հետո մասնակցել է կլանավորվածների նկատմամբ հաշվեհարդարներին:

62-ամյա Գիլերմո Ռեյես Ռամսին զանգահարել է ռադիոհաղորդմանը եւ ուղիղ եթերում պատմել, որ մասնակցել է անօրինական մահապատիժների իրականացմանը: Դրանից հետո Չիլիի մարդու իրավունքների հարցերով հատուկ ներկայացուցիչ Մարիո Կարոսան հրամայել է հետաքննություն սկսել:

Կասկածյալին հայտնաբերել են իր տանը՝ պարզելով, թե որտեղից է զանգը եղել, հաղորդում է La Nación-ը: Նա ձերբակալվել է:

Պարզվել է, որ նախկին զինվորը մասնակցել է մահապատիժներին Պիսագուա ճամբարում: Զոհերից մեկը եղել է սոցիալիստ Ֆրեդի Տաբերնա Գալեգոսը, որը նախքան հեղաշրջումը գլխավորում էր տարածաշրջանային պլանավորման վարչությունը: Հեղաշրջումից հետո նա կամավոր հանձնվել էր զինվորական իշխանություններին, սակայն սպանվել էր, հաղորդում է Lenta-ն:

Նշենք, որ 1973 թվականի սեպտեմբերի 11-ին Չիլիում տեղի է ունեցել ռազմական հեղաշրջում, որի արդյունքում տապալել են սոցիալիստ նախագահ Սալվադոր Ալյենդեին: Վերջինս նախագահական պալատի գրոհի ժամանակ սպանվել էր, նրա կառավարության անդամները, պետծառայողներ եւ ձախ քաղաքական ակտիվիստներ կալանավորվել էին, սպանվել կամ փախել երկրից:

Խունտայի կառավարման տարիներին Չիլիում լայնորեն կիրառվել են կալանավորումներ, խոշտանգումներ, արտադատարանական մահապատիժներ: Ընդհանուր առմամբ, տուժածների թիվը կազմել է 40 հազար, որոնցից 3 հազարն անհետ կորել են կամ սպանվել: