Իրաքը Թուրքիայի դեմ բողոք է հղել ՄԱԿ-ի ԱԽ-ին. Էրդողանն արդեն արձագանքել է՝ այն անվանելով «անարդար քայլ»

Tert.am-ը գրում է .

Իրաքի բողոքը թուրքական զինուժի գործողությունների վերաբերյալ ուղարկվել է ՄԱԿ-ի Անվտանգության խորհուրդ, գրում է Лента-ն: Նամակում Բաղդադը խնդրում է անհապաղ հասնել նրան, որպեսզի Թուրքիայի զորքերը դուրս բերվեն երկրի տարածքից: Իրաքում դա որակում են որպես ՄԱԿ-ի Կանոնադրության «կոպիտ խախտում»:

Պաշտոնական դիմումի ստացումը հաստատել է ՄԱԿ-ում ԱՄՆ մշտական ներկայացուցիչ Սամանթա Փաուերը, ով այս ամիս կատարում է ԱԽ-ի նախագահի պարտականությունները։

Փաստաթղթում Բաղդադը խնդրում է «պահանջել, որ Թուրքիան անհապաղ դուրս բերի իր զորքերը», ինչպես նաև «այսուհետ չխախտի Իրաքի ինքնիշխանությունը»:

«Դա դիտարկվում է որպես ՄԱԿ-ի Կանոնադրության սկզբունքների կոպիտ ոտնահարում, ինչպես նաև Իրաքի տարածքային ամբողջականության և պետական ինքնիշխանության խախտում»,- ասվում է Իրաքի մշտական ներկայացուցիչ Մուհամեդ Ալի ալ-Խակիմի նամակում:

Փաուերի խոսքով` իրաքցի դիվանագետի հետ հանդիպման ընթացքում նա չի խնդրել ԱԽ-ի հրատապ նիստ հրավիրել` թուրքական ներխուժման հարցը քննարկելու համար:

Բաղդադի այս քայլին արդեն արձագանքել է Թուրքիայի նախագահը։ Ռեջեփ Թայիփ Էրդողանն Իրաքի այդ բողոքն «անարդար քայլ» է անվանել:

«Նրանք կարող են դիմել ՄԱԿ-ին, նրանք ունեն այդ իրավունքը, սակայն դա անարդար քայլ է»,- ասել է թուրք նախագահը։

Իրաքյան իշխանությունների համաձայն՝ դեկտեմբերի 4-ին Թուրքիան տանկային գումարտակ է մտցրել Իրաքի Նայնավա նահանգ՝ տեղի քրդական ջոկատներին մարզելու անվան տակ։