Քար անտարբերություն՝ առանցքային հարցում
Օրերս իր հայտնի «Ռեքվիեմ» շարքում Միքայել Մինասյանը կրկնակի գործակալ լինելու մեջ մեղադրեց Արարատ Միրզոյանին և որպես փաստ՝ ներկայացրեց նրա ձեռքով գրված դիմումն ԱԱԾ-ին՝ սեփական ծառայությունները մատուցելու մասին: Ըստ ներկայացված պարզաբանման՝ Միրզոյանը դիմումը 2007 թվականին կամավոր չի գրել․ ԱԱԾ-ի հետ համագործակցելու նրա որոշումը ստիպողաբար է եղել, քանի որ նույն ծառայության կողմից բացահայտվել է Թուրքիայի օգտին լրտեսություն անելու փաստը: Իսկ թուրքական անվտանգությունը, համաձայն Մինասյանի աղբյուրի, Միրզոյանի հետ կապ է հաստատել և իրենով արել դեռ ԱՄՆ-ում ուսանելու տարիներին, որ պատրաստվում էր ներդրում ունենալ ցեղասպանագիտության ասպարեզում:
Մինասյանը նաև պնդում է, որ այդ իրողության մասին տեղյակ է եղել Նիկոլ Փաշինյանը, քանի որ վարչապետ ընտրվելուց հետո ԱԱԾ-ից պահանջել է օտարերկրյա գործակալների ցուցակը և ստացել: Այս հայտարարությանը պետք է հաջորդեին մի քանի քայլեր․ նախ ձեռագրագետ-փորձագետները պետք է պարզեն՝ իսկապե՞ս Միրզոյանն է գրել այդ դիմումը, թե՞ ոչ: ԱԱԾ-ն պարտավոր է հանդես գալ և պարզաբանել, եթե ոչ այն մասին, թե ինչ նպատակով և անհրաժեշտությամբ է համագործակցել մեր անվտանգության հետ Միրզոյանը, ապա գոնե հերքել կամ հաստատել նրա՝ Թուրքիայի գործակալ լինելու մեղադրանքը: Եթե գործակալ է, ինչո՞ւ մինչ օրս համապատասխան միջոցներ չեն ձեռնարկվել:
Մյուս կարևոր դրույթը, թե ԱԱԾ-ն արդյո՞ք Նիկոլ Փաշինյանին տրամադրել է օտարերկրյա գործակալների ցուցակը, և արդյո՞ք դրանց մեջ եղել է Արարատ Միրզոյանի անունը: Եվ ամենաառանցքային դրույթներից մեկը, թե ԱԱԾ-ն արդյո՞ք պետք է վարչապետին տրամադրեր գործակալների ցանկը, քանի որ այդ երկիրը չենք և հեռու ենք այդպիսին լինելու հեռանկարից, քանի որ կախված ենք եղել եւ կանք մեկ անձի որոշումներից: Ավելին՝ այդ մեկ անձը՝ Նիկոլ Փաշինյանը, պետք է բացատրություն տա․ եթե ցուցակն իր ձեռքին է եղել, և իմացել է Միրզոյանի՝ Թուրքիայի գործակալ լինելը, ինչպե՞ս և ինչո՞ւ է նրան ԱԺ նախագահ դարձրել:
Եթե, ըստ Մինասյանի, Միրզոյանի նմաններն էլի կան իշխանական մարմիններում, և դրան տեղյակ է Փաշինյանը, ինչո՞ւ է կանաչ լույս վառել և վառում նրանց առաջ: Եթե Փաշինյանը տեղյակ է, ուրեմն հանցակից է և պետական դավաճանությունը հովանավորելու մեղադրանքով պետք է ձերբակալվի:
Եթե ապացուցվի, որ Միրզոյանն իսկապես Թուրքիայի լրտես է, պետք է առաջին հերթին ձերբակալվի և մենախուց տարվի, նրա հետ նաև այն բոլոր անձինք, որոնց ցուցակը Փաշինյանի ու ԱԱԾ-ի ձեռքում է: Ողջ հասարակությունը՝ Հայաստանում և Սփյուռքում, սպասում է հերքող կամ հաստատող հիմնավոր ապացույցի ու պատասխանի: Միայն թե չասեք, որ եթե մեկ անձի որոշումից է կախված, ուրեմն ոչինչ էլ չի բացահայտվի: Սա այլևս այդ դեպքը չէ, երկրի անվտանգության, լինել-չլինելու լրջագույն խնդիր է:
Անի Ավագյան
1
2
3
4
5
1
2
3
4
1
2
3
5
