Կա՞ արդյոք որևէ հարց, որ վարչապետը կարողանում է լուծել
Ռազմագերիների խնդիրը լուծելու, նոր կառավարություն ձևավորելու և քաղաքական մի շարք այլ հարցերի մասին pressmedia.am-ը զրուցել է քաղաքագետ Ստեփան Դանիելյանի հետ։
— Պարոն Դանիելյան, Մոսկվայում եռակողմ հանդիպումից հետո պարզ դարձավ, որ ռազմագերիների հարցում կողմերն ընդհանուր հայտարարի չեն կարողացել գալ, և շատերի գնահատմամբ, Հայաստանն այս հանդիպումից դարձյալ պարտված դուրս եկավ: Ինչպես եք գնահատում տեղի ունեցածը, և որքանով են արդարացի այս քննադատություններն իշխանության հասցեին:
— Գերիների հարցը պետք է լուծի Հայաստանի իշխանությունը և եթե չի կարողանում լուծել, ապա դա ոչ թե Հայաստանի, այլ քաղաքական ղեկավարության՝ առաջին հերթին վարչապետի անկարողունակության ցուցադրությունն է։ Դա այդպես է և այդպես էլ պետք է գնահատվի։ Եվ գերիների հարցից բացի նաև այլ հարց է այն, թե արդյոք կա՞ որևէ այլ հարց, որ ինքը կարողանում է լուծել և երկրի ներսում, և դրսում։ Ես չեմ տեսնում մի այնպիսի հարց, որն այս ընթացքում ինքը կարողացել է լուծել։
— Ի՞նչ է մնում հայկական կողմին: Մի կողմից նշվում է, որ պետք է նոր կառավարություն ձևավորվի, նոր վարչապետ լինի, որն ավելի համարձակ կներկայացնի Հայաստանը, մյուս կողմից ասվում է, որ հիմա դրա ժամանակը չէ, հիմա աշխատանք իրականացնելու ժամանակն է:
— Հիմա հասարակության մեջ եղած տեսակետները ոչինչ չեն փոխում։ Մենք ունենք փաստեր, որ այս իշխանությունը որևէ հարց, այդ թվում նաև գերիների հետ կապված այդքան գերզգայուն հարցը, չի կարողանում լուծել։ Այս իշխանությանը դրսի կարևոր խաղացողները լուրջ չեն վերաբերում և այդ վերաբերմունքը նաև հրապարակավ ներկայացնում է։ Ռուսաստանի իշխանության տակ եղած լրատվամիջոցները վերջերս հոդվածներ և ծաղրանկարներ են են հրապարակում, որոնք ես տեսա նաև գերմանական մամուլում, Միացյալ Նահանգների մամուլում։ Այսինքն, սա ընդհանուր վերաբերմունք է։ Եվ եթե Հայաստանում կան մարդիկ, որոնք այլ տեսակետ ունեն և կարծում են, որ գործող իշխանությունը կարող է շարունակել կառավարել, ապա այդ դեպքում այդ մարդիկ գերիների հարցով և տնտեսական ահագնացող հարցերով պետք է լռեն և չբողոքեն ոչ-ոքի։
— Այդ դեպքում գալիս է հաջորդ հարցը՝ արտահերթ ընտրություննե՞ր, թե՞ հրաժարական և նոր ժամանակավոր կառավարություն:
— Եթե իմ տեսակետն եք հարցնում` միանշանակ գործող կառավարությունը չի կարող ընտրություններ կազմակերպել, որովհետև այդ ընտրությունները կվերածվեն քաղաքացիական պատերազմի։ Որովհետև գործող իշխանությունը հանրության մի ստվար զանգվածի մոտ ունի հեղինակություն և նորմալ ընտրություններ չի կարող անցկացնել։ Մեր ներկայիս քաղաքական դաշտը քանդված վիճակում է, և ես կարծում եմ, որ նաև հանրությունն է հոգեբանորեն քանդված և ընտրությունների գնալ չի կարող։ Մեզ պետք է այս իրավիճակից դուրս գալու ժամանակ, և քանի կա այս իշխանությունը` հանրության մեջ կայուն իրավիճակ չի կարող լինել։ Այսինքն, միակ լուծումը այս իշխանության հրաժարականն է և նոր իշխանության ձևավորումը։ Բայց, եթե, այնուամենայնիվ, գործող իշխանությունը փորձի կազմակերպել այդ ընտրությունները, ապա մենք նոր ցնցումների առաջ ենք կանգնելու և մեր խնդիրներն ավելի են բարդանալու։
— Պարոն Դանիելյան, իսկ դուք տեսնում եք այնպիսի մի ուժ, որ կարող է գալ իշխանության և գոնե գերիների հարցին շուտափույթ լուծում տալ։
— Ես կարծում եմ այսպես. առաջին հերթին այս քաղաքական ուժը, որի նկատմամբ չկա վստահություն ո՛չ դրսում, ո՛չ ներսում, պետք է գնա, և ինչ-որ համաձայնության հիման վրա գան նոր քաղաքական ուժ և ստեղծվի ինչ-որ կոմպրոմիսային իրավիճակ և կոմպրոմիսային քաղաքականություն, որը կարող է լուծել այս կարևոր խնդիրները։ Այդ կոմպրոմիսն արդեն կայացված է Վազգեն Մանուկյանի շուրջ, և ես այլ դեմք չեմ տեսնում։
Անի Սիմոնյան
1
2
3
4
5
1
2
3
4
1
2
3
5
