Փաշինյանի իշխանության իրական դեմքը
Վերջին երկուս ու կես տարին ՀՀ վարչապետի պաշտոնը զբաղեցնող անձը, որը զրկվել է այդ իրավունքից իրավական և բարոյական բոլոր նորմերով, դա փաստ է, սակայն, այդուհանդերձ՝ շարունակում է մանիպուլյացնել իր կողմից հռչակված «հպարտ» քաղաքացիներին: Հայաստանի հասարակությունը մասնատած ու միմյանց նկատմամբ ատելությամբ լցրած թշնամական գործակալը ոչ միայն ինքնակամ չի հեռանում կապիտուլյացիոն հայտարարության ստորագրումից հետո, այլև փորձում է մարդկանց համոզել, որ պետք է անցկացվեն «ազատ, արդար և թափանցիկ» խորհրդարանական ընտրություններ, և հենց ինքը կարող է կազմակերպել այդ ընտրությունները:
Թերևս արժե անդրադռնալ օրերս Նիկոլ Փաշինյանի կողմից կազմակերպված «ազատ, արդար և թափանցիկ» ընտրություններին կամ նմանատիպ այլ միջոցառումներին: Նախ, հասարակության այն մասը տեսավ, թե ինչպես և ինչպիսի «սգո» երթ կազմակերպեց վարչապետ կոչվածը դեպի Եռաբլուր: Իսկ նրանց համար, ովքեր չեն տեսնում կամ չեն ցանկանում տեսնել, ասեմ, որ այդ սրբապիղծ միջոցառումը կազմակերպվեց վարչական ռեսուրսի աննախադեպ օգտագործմամբ և, ինչպես լրատվամիջոցներից մեկն էր արձանագրել, թաղային հեղինակություններից մեկի օժանդակությամբ: Երկրորդ, դա ոչ թե սգո երթ էր՝ լուռ և արժանապատիվ, այլ համարյա թե քայլարշավ «նիկոլ, վարչապետ» վանկարկումով, ողջույնի ծափերով ու մատներով հաղթական նշանների ցուցադրումով:
Իշխանության բնորոշմամբ՝ «ազատ, արդար և թափանցիկ» ընտրություններ կազմակերպելու նիկոլական ունակությանը ծանոթանալու համար վերհիշենք ՔՊ վարչության ընտրություններից մեկ երկուսը: Առաջինը 2016 թվականի հոկտեմբերին ՏԻՄ ընտրություններին Գյումրիում և Վանաձորում տապալումից հետո գործող վարչության հրաժարականի և նոր վարչության ընտրության ընթացքում տեղի ունեցած խախտումների առումով սկանդալային բացահայտումն էր: Հենց այդ ժամանակ նոր վարչության նախագահ ընտրվեց Սասուն Միքայելյանը։
Ի դեպ, ՔՊ վարչության ընտրության հաջորդ ըտրությանը զարմանալիորեն վարչության նախագահը նույնիսկ չէր ընտրվել վարչության կազմում: Այդ երևույթը բազմաթիվ մարդկանց կարող էր թվալ զարմանալի, սակայն այդ կուսակցությունում Նիկոլի բռնապետական վարքագծին տեղյակ մարդկանց համար բնականոն գործընթաց էր: Հավելենք, որ, ըստ օդում պտտվող լուրերի՝ տարիներ առաջ նման ձևով են անցել նաև Լևոն Տեր-Պետրոսյանին հարող երիտասարդների «Հիմա» շարժման ղեկավար մարմնի՝ Փաշինյանի ղեկավարությամբ կազմակերպված ընտրությունները, ինչը կարող են հաստատել այդ ընտրություններին մասնակցած, այժմ արդեն հասուն մարդիկ:
Այս պատմությունները վկայում են, թե ինչպիսի «ազատ, արդար և թափանցիկ» ընտրություններ կկազմակերպվեն, եթե Փաշինյանը շարունակի զբաղեցնել վարչապետի աթոռը: Եվ թող որևէ մեկը չվկայակոչի 2018 թ. դեկտեմբերի ընտրությունների մաքուր անցկացումը, քանի որ դրանք որևէ ձևով խաթարելու կամ նույնիսկ կեղծելու կարիք չկար. երկրում շարունակում էր տիրել հետհեղափոխական էյֆորիան, և ընտրողները դեռևս իրենց պատկերացնում էին «հպարտ քաղաքացիներ», իսկ նիկոլ փաշինյանին՝ «հպարտ քաղաքացիների» առաջնորդ:
Անի Ավագյան
1
2
3
4
5
1
2
3
4
1
2
3
5
