Պետք է հետ նայել, վերլուծել անցյալը և դրանից հետևություններ անել. Վիգեն Խաչատրյան

Քաղաքագետ Վիգեն Խաչատրյանը, անդրադառնալով իշխանության անցած ուղուն, Pressmedia.am-ի հետ զրույցում նշեց, որ իշխանության գալու առաջին իսկ օրից ակնհայտ էր, որ նոր իշխանությունները կառավարման փորձ չունեն, որպեսզի կարողանան իրենց առջև դրված խնդիրները հաջողությամբ իրականացնել: Եվ այն ցանկությունները, որոնք այս ընթացքում արտահայտում էր իշխանությունը, դժվար էր իրականացնել առանց իշխանական երրորդ՝ դատական համակարգի բարեփոխումների: Նրա կարծիքով՝ այսօրվա իրավիճակի համար պատասխանատու է անգամ ինքը, քանի որ երկար տարիներով ապրել է պատրանքներով, հավատալով ո՛չ պատերազմ, ո՛չ խաղաղություն բանաձևի երկարակեցությանը:

«Անշուշտ պարտվել են իշխանությունները, բայց պարտվել ենք նաև մենք: Եվ որպեսզի մենք այս պարտությունից դասեր քաղենք, պետք է ամեն ինչ անենք, որ հանդես չգանք ծաղրածուի դերում: Պետք է հետ նայել, վերլուծել անցյալը և դրանից հետևություններ անել»,- ասաց Վ. Խաչատրյանը:

Ըստ նրա՝ Հայաստանում կան մասնագետներ, որոնք կարող են ավելի լավ աշխատել, իսկ հասարակությունը չի ցանկանում արդեն իշխանության եղած ուժերին նորից բերել իշխանության: «Ես հարգանքով եմ վերաբերվում բոլոր կուսակցությունների քաղաքականությամբ զբաղվելու ցանկությանը, բայց չեմ ընդունում ռևանշիզմը: Կուսակցությունները պետք է իրենց ծրագրերը ներկայացնեն և դրանով ժողովրդին համոզեն, որ իշխանության գալու դեպքում երկիրը կշենացնեն և կկառուցեն հզոր հայրենիք: Պետք է հարգել Սահմանադրությունը և բոլոր քայլերը իրականացնել օրենքի շրջանակներում: Իմ կարծիքով մեզ պետք է քաղաքական նոր հասանք, ավելի պատրաստված, ավելի իրատես»,- ասաց Վ. Խաչատրյանը:


Անի Ավագյան

Pressmedia.am