Վարչապետը հանձնարարել է հեշտացնել հիպոտեքային վարկերի տոկոսադրույքների փոխհատուցման գործընթացը

Այսօր տեղի է ունեցել ՀՀ կառավարության հերթական նիստը, որը վարել է ՀՀ վարչապետ Հովիկ Աբրահամյանը:

Նախ վարչապետն անդրադարձել է ս.թ. հունվարի 1-ից ուժի մեջ մտած «Եկամտային հարկի մասին» օրենքի փոփոխություններին, որոնց համաձայն բնակարան ձեռք բերելու կամ անհատական բնակելի տուն կառուցելու համար ստացված հիպոթեքային վարկի սպասարկման տոկոսներն ըստ էության վճարում է պետությունը՝ դրանով իսկ նվազեցնելով վարկառու անձանց ֆինանսական բեռը: Կառավարության ղեկավարը նաև շեշտել է, որ այս փոփոխությամբ գործադիրը երկու կարևոր խնդիր է լուծել՝ աջակցել քաղաքացիներին, որպեսզի նրանք մատչելի պայմաններով բնակարան ձեռք բերեն և նպաստել շինարարության ոլորտի ակտիվացմանը: Ուստի ցանկալի է, որ հնարավորինս շատ մարդ օգտվի այս արտոնությունից: Հովիկ Աբրահամյանն այնուհետև հավելել է, որ ներկայումս քաղաքացիներից ահազանգեր են հնչում, որ գործընթացը բավական բարդ է, մեխանիզմները՝ ոչ այնքան հասկանալի, ինչը լրացուցիչ խոչընդոտներ է ստեղծում օրենքի ընձեռած հնարավորությունից օգտվողների համար: Հաշվի առնելով այս հանգամանքը և ականջալուր լինելով քաղաքացիների մտահոգությանը, վարչապետը ՀՀ ֆինանսների նախարարությանը հանձնարարել է կարճ ժամկետում ուսումնասիրել հասարակության արծարծած հարցադրումները՝ հաստատված մեխանիզմներն առավելագույնս պարզեցնելու համար և գործընթացի ավարտից հետո պատշաճ կարգով իրազեկել հանրությանը:

Սա իսկապես կարևոր խնդիր է և լուծման կարոտ: Հաճախ կառավարության ընդունած որոշումները իսկապես կարող են օգտակար լինել հասարակության տարբեր շերտերի համար, սակայն թղթարարական, վարչարարական տարբեր խոչընդոտների, ինչպես նաև անհասկանալի ձևակերպումների պատճառով մնում են թղթի վրա: Այստեղ, իհարկե, ողջունելի է կառավարության ցանկությունը՝ խթանել մի գործընթացի, որը չնայած լրացուցիչ բեռ է բյուջեի համար, սակայն բազմաթիվ երիտասարդ ընտանիքների հնարավորություն է տալիս հիպոթեկային վարկերով ձեռք բերել բնակարաններ՝ տոկոսների վճարման տեսքով զգալի աջակցություն ստանալով պետության կողմից:

Հուսանք, որ ստացված հանձնարարականները կյանքի կկոչվեն կառավարության որոշումը իսկապես կծառայի իր նպատակին:

Անդրանիկ Բարսեղյան