Մի քանի դիտարկում հանրաքվեի հետ կապված

Blog 8 Դեկտեմբեր, 2015 11:09

Նարեկ Սարգսյանը ֆեյսբուքյան իր էջում գրում է .

Երեկվանից որոշ անհատներ և մարգինալ քաղաքական հոսանքների ներկայացուցիչնր նեղսրտում են, թե ին՞չու չենք ասում, որ ընտրությունները կեղծվել են, կամ այլ կերպ ասած ին՞չու եղածին «քաղաքական գնահատական» չենք տալիս: Անկեղծ մինչ այս պահը անտեղի եմ համարել խոսել ակնհայտ իրողությունների մասին, քանի որ դրանք առանց այդ էլ պարզ և հասկանալի են բոլորին բայց, այնուամենայնիվ, փորձեմ հնարավորինս ամփոփ ձևով ներկայացնել իմ տեսանկյունից ամենակարևոր փաստերը:

1. Պետք է հստակ արձանագրել, որ հերթական անգամ համապետական ընտրությունները հանրային ընկալումներում մնացին, որպես հերթական կեղծված ընտրությունները: Այս առումով մեր քաղաքական համակարգը 1995-ից սկսած գտնվում է նույն շրջապտույտի մեջ:

2. Ընտրությունների ընթացքում արձանագրվեց ևս մի շատ կարևոր հանգամանք. այն տեղամասերում, որտեղ կար քաղաքաքացիական վերահսկողություն հնարավոր եղավ առավելագույնս վերահսկել գերծընթացը: Կարևոր եմ համարում հստակ առանձնացնել քաղաքացիական հասարակության ներկայացուցիչներին քաղաքական ուժերի ներկայացուցիչներից:

3. Իշխանությունները հերթական անգամ գործի դրեցին քրեական տարրերին: Ես անձամբ 20-ից ավել ընտրատեղամասերում ականատես եմ եղել թաղային հեղինակությունների ակտիվ գործունեությանը: Այս խնդիրը եղածներից, թերևս, ամենաբացասականն է և առաջինը վնասելու է հենց իշխանություններին: Թաղային հեղինակությունների առկայությունը տեղամասերում և «հարց լուծողի» կարգավիճակը վերացնում է ընտրական համակարգն ու առաջինը իշխանություններին:

4. Հերթական անգամ արձանագրվեց, որ մենք գործ ունենք կատարյալ իմպոտենտ ընդդիմադիր ուժերի հետ: 75 տոկոսից ավելի ընտրատեղամասերում ընդդիմադիր քաղաքական ուժերը կամ՛ չունեին ներկայացուցիչներ (հանձնաժողովի անդամ կամ վստահված անձ), կամ՛ ունեին, բայց չունենալու հաշիվ էր: Մեր կազմակերպության դիտորդներն ու լրագրողները յուրաքանչյուր տեղամասում փորձում էին հանդիպել Ժառանգության կամ ՀԱԿ-ի ներկայացուցիչներին և նրանցից փորձել ճշտել տեղամասում առկա խախտումները:

5. «Ոչ»-ը պաշտոնապես ստացավ 421,593 քվե, բայց ընդդիմության հանրահավաքներին մասնակցում են, լավագույն դեպքում, 3000 քաղաքացի: Այս ակնհայտ փաստը ևս գալիս է փաստելու այն ակնառու իրողությունը, որ քաղաքական համակարգի ընդդիմադիր հատվածն իրեն ուղղակիորեն սպառել է և արդեն ժամանակի հրամայական է դարձել նոր որակի ընդդիմադիր հատված ձևավորելը:

6. Ազատության հրապարակում հավաքված մարգինալների խմբակը այս իշխանությունների հարատևությունը ապահովելու գրավականն է դարձել: Հենց այդ ուժերն են սպասարկում ՀՀԿ-ի իշխանության վերարտադրությանը: Ոչ մի սահմանադրական փոփոխություն այդքան արդյունավետ ձևով չի կարող ապահովել Սերժ Սարգսյանի վերարտադրությունը, որքան Ազատության հրապարակում «սեզոնային հեղափոխության» դաշտային հրամանատարներն իրենց 2-3 հազարանոց հետևորդներով: