Շատ քիչ դեպքերում ենք մեր ազգային շահից բխող քայլեր կատարում, ինչը ընդունելի չէ. Տարոն Սիմոնյան

ԱԺ «Լուսավոր Հայաստան» խմբակցության պատգամավոր Տարոն Սիմոնյանի կարծիքով քաղաքական պայքարի ժամանակ պարտադիր չէ, որ այն հարթակներում կանգնելու ձևաչափով դրսևորվի: Կան նաև պայքարի ինստիտուցիոնալ հարթակներ, որից կուսակցությունն օգտվում է:

 

Pressmedia.am-ի հետ զրույցում՝ անդրադառնալով Մինսկի խմբի համանախագահների տարածաշրջանային այցին` պատգամավորը նշեց, որ հայկական կողմի համար այն կարևոր էր, որի շրջանակներում մենք պետք է կարողանանք ներկայանալ մեր շահի տեսանկյունից և այն չպետք է նույնացնենք այլ պետության շահերի հետ:

 

«Հայկական կողմն ունի իր շահը, ուստի, դրա կենսագործման համար պետք է փնտրել և գտնել բոլոր հնարավոր ուղիները և հնարավորությունները: Վերջին տարիներին Հայաստանի կողմից վարած պետականության ամենամեծ մարտահրավերը հուզական քաղաքականություն վարելն է եղել, որը դիվանագիտական հարթությունում ընկալելի չէ: Ուստի, ինձ համար Արցախի և Հայաստանի վարկանիշի տեսանկյունից որևէ կերպ ընկալելի չէր Արցախի նախագահի չմասնակցելը Մինսկի խմբի համանախագահների հետ հանդիպմանը: Մենք պետք է մեկ բան հասկանանք, որ երկար տարիներ գոյատևելով այս տարածաշրջանում և ներկայում ունենալով անկախ պետականություն, շատ քիչ դեպքերում ենք կարողանում մեր ազգային շահից բխող քայլեր կատարել: Մինչդեռ անցած 30 տարիներին մենք պետք է կարողանայինք վերլուծել մեր բոլոր բարեկամների ու հակառակորդների շահերը, հաշվարկեինք մեր գերակայությունները, դրանք համադրեինք մեր պետական շահի հետ և նոր միայն այդ շրջանակներում գործողություններ իրականացնեինք: Իսկ, եթե մենք պետք է այլ պետությունների շահերը սպասարկելով փորձենք մեր շահերն առաջ տանել, ապա դա ոչ մի տեղ տանող ճանապարհ է: Արդյունքում մենք մեր շահերը զիջում ենք: Մենք անգամ չենք կարողանում հաշվարկել մեր գործընկերների և ռազմավարական դաշնակիցների շահերը և դրանք համադրել մեր շահերի հետ: Եվ արդյունքում մենք կրկին հայտվում ենք շահերը սպասարկողի դերում և կորցնում ենք սեփականը»,- ասաց Տ. Սիմոնյանը: