Աննախադեպ աջակցություն զինծառայողներին

Կարեն Մկոյանը իր ֆեյսբուքյան էջում գրում է.

Զինծառայողների և նրանց ընտանիքի անդամների սոցիալական ապահովության խնդիրները գտնվում են հասարակության ուշադրության կենտրոնում:

Կառավարությունը բազմիցս անդրադարձել է այս խնդրին, ավելացվել են սոցիալական նպաստների և կենսաթոշակների չափերը, նախատեսվել են մի շարք արտոնություններ, սակայն զինծառայության ընթացքում վնասվածք ստացած զինծառայողին արտերկրում բուժման հնարավորություն տալու հարցը օրենսդրորեն դեռևս կարգավորված չէ:
Ավելին, բոլորովին վերջերս մարտական գործողությւոնների հետևանքով վիրավորված զինծառայողի արտերկրում բուժման հարցը լուծելու համար նույնիսկ վարչապետ Հովիկ Աբրահամյանը կառավարության անդամներին հորդորեց իր օրինակով սեփական միջոցներից հանգանակություն կատարել:

Եվ ահա այսօր կառավարության նիստում քննարկվել է ԱԺ պատգամավոր Էդմոն Մարուքյանի օրենսդրական նախաձեռնությունը: Օրինագիծն ընդհանուր առմամբ դրական է գնահատվել, սակայն մեկ վերապահում. կառավարությունն այն ընդունելի կհամարի իր առաջարկություններն ընդունելու դեպքում:

Նախապես նշենք, որ կառավարության վերապահումները մեկ հիմնական նպատակ են հետապնդել. ընդունել ամբողջական և համալիր օրինագիծ:

Եվ այսպես, ինչ է պարունակում զինծառայողների համար խիստ կարևոր այս նախագիծը:
Կառավարությունը նախև առաջ նպատակահարմար է գտնում օտարերկրյա պետությունում բուժում ստանալու հնարավորություն տալ մարտական հերթապահություն իրականացնելիս վիրավորված կամ վնասվածք ստացած զինծառայողներին, եթե տվյալ բուժումը անհնար է իրականացնել Հայաստանում:

Հանրապետությունից դուրս զինծառայողի բուժման, կեցության և ճանապարհածախսի գումարը կհատկացվի ՀՀ պետական բյուջեի միջոցների հաշվին, ինչը նշանակում է, որ կլինի երաշխավորված:

Ավելին, ուղեկցող անձի անհրաժեշտության դեպքում կհատուցվի նաև նրա ճանապարհի և կեցության ծախսը: Կառավարության նման մոտեցումը մարտական հերթապահություն իրականացնելիս վիրավորված զինծառայողներին աննախադեպ է և արժանի ամենայն խրախուսանքի:

Մնում է հուսալ, որ օրինագիծը Ազգային ժողովի կողմից ընդունվի արագացված ընթացակարգով: