Ադրբեջանում հանրությունը չի վստահում տեղական ԶԼՄ-ներին

Ադրբեջանում հանրությունն այլեւս չի վստահում տեղական ԶԼՄ-ներին երկրում տեղի ունեցող որեւէ իրադարձության վերաբերյալ տեղեկատվության հաղորդման ժամանակ: Ադրբեջանական հասարակությունը դրանում մեկ անգամ եւս համոզվեց, երբ Կասպից ծովում ադրբեջանական «Գյունեշլի» նավթային հանքահորում երեք օր շարունակվող հրդեհի վերաբերյալ ճշմարտությունն իրենից բացահայտ գաղտնի պահվեց :

Այս մասին, ինչպես հաղորդում է «Արմենպրես»-ը, հայտնում է moderator.az լրատվական կայքը' նշելով, որ տեղական լրատվամիջոցների նկատմամբ վստահության մակարդակն այնքան ցածր է, որ Ադրբեջանի քաղաքացիները հրդեհի հետ կապված տեղեկատվությունը քաղում էին արտասահմանյան գործակալություններից եւ համացանցային ռեսուրսներից:

Կայքը հայտնում է, որ դա արտահայտվեց այն բանով, որ նավթային հարթակի բանվորներից մեկը, ով խնդրել էր չհայտնել իր անունը, զանգահարել էր «Ռոյթերս»-ի թղթակցին եւ հայտնել, որ հարթակից չի կարողանում դուրս գալ 84 մարդ:

«Նա զանգարահել է ոչ թե որեւէ ադրբեջանական հեռուստաալիք, ոչ թե որեւէ հայրենական թերթ, լրատվական գործակալություն կամ ադրբեջանական ինտերնետային աղբյուր, այլ ամերիկյան «Ռոյթերս», որովհետեւ արեւմտյան ԶԼՄ-ներին ավելի շատ է վստահում: Արդյունքում մենք տեսնում ենք, որ ադրբեջանական ընթերցողն ընտրում է արտասահմանյան ԶԼՄ-ները», -գրում է կայքը:

Ադրբեջանցի հեռուստալրագրող, մամուլի փորձագետ Գուլու Մահառամլին ադրբեջանական մամուլի վերջին երկու օրերի գործունեությունը «խայտառակություն» է անվանել:

«Մեր զոհերի թվաքանակի հետ կապված ճշմարտությունն արտասահմանյան մամուլից տեղեկանալը խայտառակություն է: Մերոնց փոխարեն «Ռոյթերս»-ը հայտնեց 32 զոհի մասին: Դա հանրության, նավթագործների ընտանիքների հանդեպ անհարգալից վերաբերմունք է եւ ամոթալի' տեղեկատվական դաշտի համար», -ասել է նա:

«Գյունեշլի» հանքահորում որոնողական-փրկարար աշխատանքների մասնակից Դենիս Բորոդինը Facebook-ում գրել է, որ իրենց աշխատանքում ամենացավալին եւ զզվելին այն էր, որ տարբեր տրամաչափի պաշտոնյաներ, փոխանակ զբաղվեին աղետի ենթարկվածներին փրկելու աշխատանքները կազմակերպելով, ամեն րոպե զանգում, խանգարում եւ հանձնարարում էին, թե «ինչ կարող ենք ԶԼՄ-ներին հայտնել, ինչ' ոչ»:

«29 մարդ 12 ժամ նստած էին մնացել երկրորդ ռետինե նավակում: Նրանց բախտը բերեց, փրկվեցին, իսկ մնացածները զոհվեցին», -նշել է նա:

Ադրբեջանցիները սեփական ԶԼՄ-ներին եւ պետական կառույցներին չեն վաստահում նաեւ բանակում տեղի ունեցող նեգատիվ երեւույթները հանրությունից թաքցնելու պատճառով:

Ադրբեջանի ազատ դեմոկրատներ կուսակցության առաջնորդ Սուլհեդդին Աքբերն այդ առնչությամբ հայտարարել էր, որ ադրբեջանական հասարակությունը պաշտպանության նախարարությունից պանջում է չթաքցնել ադրբեջանական բանակում տեղի ունեցող բացասական երեւույթները եւ զինվորների մահերը, ինչպես նաեւ ճշմարտացի տեղեկատվություն հաղորդել: Ադրբեջանցի լրագրող Չինգիզ Սուլթանսոյն էլ ցավ է հայտնել, որ Ադրբեջանում մարդիկ չեն հավատում ՊՆ տեղեկատվությանը, ինչի պատճառով այդ կառույցի նկատմամբ վստահությունը կորել է: