Նիկոլ Փաշինյանը՝ Շուշիի և բանակցությունների մասին

Ազգային ժողովում պատգամավորների հետ հանդիպման ժամանակ այսօր «Իմ քայլը» խմբակցության պատգամավոր Տաթևիկ Հայրապետյանը հարցրեց վարչապետ Նիկոլ Փաշինյանին՝ Շուշիի հարցը երբևիցե որևէ բանակցային փաթեթի մաս չի կազմել։ Ես չգիտեմ որևէ դեպք, որ քննարկվի Շուշիի հարցը։

«Թուղթ են ցույց տալիս, ասում են՝ վայ, թղթում Շուշիի մասին բան չկա։ Բան չկա, դրա համար էդ թուղթը չի իրագործվել։ Կյանքի՞ է կոչվել այդ թուղթը, էնքան թղթեր կան, Կազանի թուղթն էլ կա, որևէ թուղթ կյանքի կոչվե՞լ է։ Իսկ ինչո՞ւ կյանքի չեն կոչվել, էդ լավ փաստաթղթերը, որոնք գրված են եղել, չեն ուզեցե՞լ ստորագրեն։ Ինչ-որ դավադրությո՞ւն է եղել, ոչ։ Երբ ինձ հարցնում են պարամետրերի մասին, թե որ պահին էր ինչ հնարավոր, ես պատասխանում եմ՝ որ պայմաններում էր ինչ հնարավոր»,- ասաց Փաշինյանը։ Ըստ վարչապետի՝ խնդիրն այն է, որ ինչ-որ թղթերի ավելի շատ ենք հավատացել, քան իրողություններին։ Եվ հիմա էլ դա քարոզչության նպատակով է օգտագործվում։

«Այսինքն՝ ի՞նչ են ուզում ասել, ուզում են ասել, որ ինչ-որ իրավիճակում հնարավոր է եղել ավելի լավ բան, և Հայաստանի կառավարությունը դրանից հրաժարվե՞լ է»,- նշեց Փաշինյանը։

Նա հավելեց․ «Դուք խոսում եք բանակցային փաթեթների մասին։ Իսկ որևէ բանակցային փաթեթ կյանքի կոչվե՞լ է։ Մենք բանակցային փաթեթ ասելով՝ նկատի ունենք թղթեր, որոնք գոյություն են ունեցել։ Եվ հաջորդ հարցը, որ այդ բանակցային կոնտեքստում պիտի ծագի, իսկ ի՞նչ պայմաններ են անհրաժեշտ, որ դեպքում է, որ որևէ բանակցային փաթեթ կդառնա իրականություն։ Վերջին 2,5 տարվա ընթացքում իմ ունեցած շփումները, քննարկումները ինձ համար կասկած չեն թողնում, որ պատերազմի կանխարգելումը միանշանակ պետք է ենթադրեր հայկական կողմից հրաժարումը Լեռնային Ղարաբաղի կարգավիճակից և տեսանելի ապագայում կարգավիճակը ճշգրտող մեխանիզմների պահանջից և Շուշիից։ Այո, բանակցային փաթեթներ եղել են, բանակցային փաթեթը թուղթ է, որի վրա կարող ես գրել քո լավագույն ցանկությունները նույնիսկ։ Բայց այդ բանակցային փաթեթներից որևէ մեկն իրագործվե՞լ է։ Մենք խոսում ենք իրականության մասին, թե՞ մենք խոսում ենք տեսական քննարկումների մասին»,- ասաց նա։

Ըստ Փաշինանի՝ այդ տեսական քննարկումների դաշտն անվերջ երկարաձգելու մեր հնարավորությունները 2016 թվականի ապրիլյան պատերազմով սպառվել են։ «Եվ մենք 2016 թվականի ապիլից հետո ունեինք երկու ընտրություն՝ կամ հրաժարվել մեր իրավունքներից, կամ փորձել պաշտպանել մեր իրավունքները»,- հավելեց նա։

«Նախկին իշխանության ներկայացուցիչները իմացել են ինչ է կատարվում, բա ապրիլյան պատերազմը ո՞նց կանգնեցվեց, հենց նե՞նց։ Մեկը հասկացա՞վ՝ ապրիլյան  պատերազմը ինչ պայմանով կանգնեց։ Բա հարց չեք տալիս՝ էդ ո՞նց եղավ, որ էս պատերազմը կանգնեց, էն պատերազմը չկանգնեց։ Կամ էդ ապրիլյան պատերազմը որտեղի՞ց եղավ, ի՞նչ տեղի ունեցավ 2016 թվականի ապրիլին կամ դրանից առաջ, հունվարին ինչ տեղի ունեցավ, հոկտեմբերին, ինչո՞ւ կանգնեց և ո՞վ ինչ պարտավորություն ստանձնեց։ Թող ոչ ոք իրեն մարգարեի տեղ չդնի, իրենք գիտեին՝ այդ հարցն ուր է հատել, մեր սխալը գուցե էն ա, որ մենք չենք եկել ժողովրդին ասել, որ այսպիսի վիճակ է»,- նշեց Փաշինյանը։

Նա ասաց, որ ողջունում է ընդդիմության առաջարկը՝ այս պատերազմի հետ կապված քննիչ հանձնաժողով ստեղծելու առաջարկը։