Նիկոլ Փաշինյանը անդրադարձավ հարցին, թե ինչու է Արցախի վերաբերյալ փաստաթուղթը ստորագրել

Ֆեյսբուքի ուղիղ եթերում վարչապետ Նիկոլ Փաշինյանը անդրադարձավ հարցին, թե ինչու է Արցախի վերաբերյալ փաստաթուղթը ստորագրել։

«Նախ ինչո՞ւ եմ ես կայացրել այսպիսի որոշում, այսպիսի որոշում կայացրել եմ այն բանից հետո, երբ ըստ էության բանակը շարունակաբար պնդել է նման քայլի գնալու անհրաժեշտությունը։ Այսինքն՝ երբ բանակն ասում է, որ պետք է կանգնել, որովհետև մենք ունենք որոշակի խնդիրներ, որոնց լուծման հեռանկարը կամ չի երևում, կամ այդ խնդիրները լուծելու ռեսուրսը սպառված է կամ այդ խնդիրների հետևանքով մենք ունենք որոշակի պրոբլեմներ»,- ասաց նա։

Փաշինյանը նշեց՝ բախվել են այնպիսի տարօրինակ դեպքերի, որ, օրինակ, ԶՈւ զորամասը, գունդը պետք է մարտական նպատակով տեղափոխվեր, բայց տվյալ բնակավայրի բնակիչները փակել են զորամասի դռները, շրջափակել մեքենաները և թույլ չեն տվել, որ զորամասից մեքենաները դուրս գան։ Դրա հետևանքով մենք ունեցել ենք զինվորին, գունդը, զինտեխնիկան առաջնագիծ հասցնելու խնդիր։ Եվ սա բերել է լուրջ ու ծանր հետևանքների։

Փաշինանն ասաց՝ հաջորդ խնդիրը զորահավաքային համակարգի հետ է կապված։ «Փորձը ցույց տվեց, որ քաղաքացիական կյանքից եկած մարդիկ, ցավոք սրտի, այնքան էլ պատրաստ չեն ռազմական գորոծողություններին լիարժեք մասնակցնելու։ Նրանք արագ կորցնում են մարտունակությունը։ Եվ դա խնդիրներ է առաջացնում։ Նույնը վերաբերում է նաև կամավորների որոշակի շերտի, որոնք էլի քաղաքացիական կյանքից կամավոր եկել են, բայց ինչ-որ պահի նրանց մոտ մարտունակության խնդիրներ են առաջանում։ Սա ամենևին չի նշանակում, որ ՄՕԲ ռեսուրսով և կամավորներով ներգրավված բոլոր մարդիկ նույն վիճակում են եղել։ Մենք ունեցել ենք ՄՕԲ ռեսուրսից էլ, կամավորներից էլ մարդիկ, ովքեր հերոսական կռիվ են տվել։ Բայց ընդհանուր առմամբ այս ոլորտում մենք տեսել ենք խնդիրներ։ Եվ մենք որոշակիորեն բախվել ենք նաև դասալքության պրոբլեմի հետ, որը, ցավոք սրտի, ոչ մի կերպ հնարավոր չի եղել լուծել»,- հավելեց նա։

Երբ ներգրավված ամբողջ ռեսուրսն արդյունավետ չի եղել, ըստ վարչապետի, հետևյալ խնդիրն է առաջացել՝ լավ կռվող զինվորները, կամավորները շատ հաճախ իրենց փոխարինող չեն ունեցել։ Առաջնագծում եղել են մարդիկ, ովքեր մեկ ամիս շարունակ մնացել են և հնարավոր չի եղել նրանց փոխարինող գտնել։ «Ահա այս պատճառները մեզ համար ստեղծել են բավական լուրջ պրոբլեմներ։ Այն աստիճան, որ մեր բանակը և Արցախի քաղաքական ղեկավարությունը շատ հստակ խնդիր է ձևակերպել, որ պետք է ժամ առաջ, րոպե առաջ կանգնեցնել պատերազմը, հակառակ դեպքում հետևանքները կլինեն շատ ավելի ծանր։ Մենք հայտնվել ենք մի իրավիճակում, որ այլընտրանք գոյություն չուներ»,- նշեց նա։

Փաշինյանն անդրադարձավ հարցին, թե ինչո՞ւ սեպտեմբերի 27-ին նույն պայմաններով հրադադար կամ զինադադար չի կնքվել։ «Մի պարզ պատճառով՝ սեպտեմբերի 27-ին զինադադարի պայմանները շարունակում էին մնալ նույնը, այսինքն՝ եթե մենք զինադադար էինք խնդրում, դա կարող էր բավարարվել կամ ընդունվել միայն ձեզ և մեզ հայտնի 7 շրջանները վերադարձնելու կամ հանձնելու պայմանով։ Իսկ մենք նման քայլի չէինք կարող գնալ, որովհետև մենք հավատում էինք, որ Արցախի ՊԲ-ն, մենք բոլորս կկարողանանք այնպես անել, որ կկարողանանք պարտադրել հրադադար։ Դա, սակայն, ցավոք սրտի, տեղի չունեցավ։ Մենք չէինք կարող մտածել, որ տարածքներ հանձնելը հրադադարի հասնելու ճիշտ ճանապարհն է։ 

Ավելին՝ այստեղ