Բաքու գնում ենք մեդալների համար. ըմբշամարտի ֆեդերացիա

Հայ ըմբիշները Եվրոպական խաղերին մասնակցում են միայն և միայն մեդալների ակնկալիքով:Լրագրողների հետ զրույցում այս մասին ասաց Հայաստանի ըմբշամարտի ֆեդերացիայի փոխնախագահ Հրանտ Ենոքյանը: «Ինչպես գնում ենք ցանկացած այլ երկիր մրցումների, այնպես էլ այստեղ ենք գնալու, բայց մեկ տարբերությամբ. Բաքվի խաղերին պետք է մասնակցենք ավելի մեծ ոգևորությամբ: Պետք չէ լարվել կամ հուզվել: Մենք Բաքու չենք գնում ընդամենը ներկայանալու համար, այլ գնում ենք մեդալների հետևից»,-ասաց Ենոքյանը:

Առաջին Եվրոպական խաղերը կանցկացվեն Բաքվում 2015 թվականի հունիսի 12-28-ը։ Հայաստանն այդ խաղերում ներկայացված կլինի 6 մարզաձևով` բռնցքամարտ, ըմբշամարտ, սամբո, ձյուդո, թաեքվանդո, հրաձգություն: Բռնցքամարտում Հայաստանը կներկայացնեն 6 մարզիկ` Արտյոմ Ալեքսանյանը (49 կգ), Նարեկ Աբգարյանը (52 կգ), Արամ Ավագյանը (56 կգ), Սամվել Բարսեղյանը (60 կգ), Հովհաննես Բաչկովը (64 կգ), Նիկոլ Հարությունովը (81 կգ): Ձյուդոյում` 3 մարզիկ` 60 կգ քաշային Հովհաննես Դավթյանը, 73 կգ քաշային Դավիթ Նիկոսղոսյանը և 52 կգ քաշային Ժաննա Ստանկևիչը: Հրաձգությունում` 2 մարզիկ` Հրաչիկ Բաբայանը, Նորայր Առաքելյանը: Հունահռոմեական ոճի ըմբշամարտում 4 մարզիկ` Ռոման Ամոյանը (55 կգ), Միհրան Հարությունյանը (66 կգ), Կարապետ Չալյանը (75 կգ) և Մաքսիմ Մանուկյանը (85 կգ): Ազատ ոճայիններ` 6 մարզիկ` Գարիկ Բարսեղյանը (57 կգ), Վոլոդյա Ֆրանգուլյանը (61 կգ), Դավիթ Սաֆարյանը (65 կգ), Գրիգոր Գրիգորյանը (74 կգ), Մուրսա Մուրթազալիևը (86 կգ), Լևան Բերյանիձենը (125կգ):
Այս խաղերի համար նախատիպ են եղել Համաամերիկյան եւ Ասիական խաղերը:

Եվրոպական խաղերի ծրագրում ընդգրկված են 16 օլիմպիական և 4 ոչ օլիմպիական մարզաձևեր: