Ահաբեկչական անկլավ Ադրբեջանում. կամ Թուրքիան կգնա, կամ Ռուսաստանը

Lragir.am-ը գրում է.

Ռուսաստանի օդատիեզերական ուժերը հերթական ավիահարվածն են հասցրել Իդլիբի ահաբեկչական ճամբարներին: Ռուսաստանն այդ ավիահարվածները հասցնում է Արցախում Թուրքիայի սանձազերծած ահաբեկչական պատերազմից ի վեր, որտեղ ներգրավված են նաեւ ահաբեկիչներ Սիրիայի թուրքամետ ահաբեկչական կազմակերպություններից:

Ռուսաստանն այդ առնչությամբ հայտնում է իր պարբերական մտահոգությունը, իսկ հակաահաբեկչական գործողություն իրականացնում է ոչ թե մտահոգության վայրում, այլ Իդլիբում: Արդյոք Մոսկվան փորձում է այդպիսով Թուրքիային կտրել Կովկասից եւ այսպես ասած վերստին քաշել Իդլիբ, այնտեղ էլ պայմանավորվածության գալու համար, ինչպես տարեսկզբին:

Թուրքիան Արցախի դեմ ահաբեկչական պատերազմով փորձում է Ռուսաստանին պայմանավորվածություն պարտադրել Կովկասում, ինչին Մոսկվան փորձում է ընդդիմանալ, քանի որ դրանից հետո հաջորդ պայմանավորվածությունը պարտադրվելու է արդեն ՌԴ հարավում` Հյուսիսային Կովկասում:

Կհաջողվի՞ դա Մոսկվային, թե՞ այլընտրանք կմնա Կովկասում ահաբեկչական խմբավորումներին ուղիղ հարվածներ հասցնելը: Մոսկվան այդ հարվածներից ձեռնպահ է մնում, քանի որ դա կարող է բերել Ադրբեջանի հտ ուղիղ դիմակայության, ինչից Կրեմլը փորձում է խուսափել:

ՌԴ համար իրավիճակը բարդ է հենց իր պարզության մեջ` կամ Ռուսաստանն է դուրս բերում Թուրքիային Կովկասից, կամ Թուրքիան Ռուսաստանին: Ռազմավարական հեռանկարում չկա այլ տարբերակ:

Միեւնույն ժամանակ, ՌԴ ԱԳՆ խոսնակը հայտարարեց, թե իրենց մտահոգում է Կովկասում ահաբեկչական «անկլավի» առաջացման հեռանկարը: Եթե ձեւակերպվի ահաբեկչական անկլավի գոյությունը, ապա հաջորդիվ արդեն ձեւակերպվելու են այդ անկլավին հասցվելիք ուղիղ հարվածների հիմքերը:

Ավելին՝ այստեղ