Իսրայելը շարունակում է զենքի մատակարարումներն Ադրբեջանին. երեկ էլ Բաքվից մի ինքնաթիռ իջավ

Մեր զրուցակիցն է Երուսաղեմի Հայոց պատրիարքարանի դիվանապետ Հայր Կորյուն վարդապետ Բաղդասարյանը

Վարչապետ Նիկոլ Փաշինյանը իր հարցազրույցում անդրադառնալով Իսրայելի կողմից Հայաստանին հումանիտար օգնություն տրամադրելու առաջարկությանը, ասել էր՝ այդ օգնությունն ուղղեք վարձկաններին ու ահաբեկիչներին, որոնց զինում եք: Ինչպե՞ս եք գնահատում նրա այս հայտարարությունը:

Ես կարծում եմ, որ հնարավոր չէ, որ մի կողմից Իսրայելը զենք մատակարարի Ադրբեջանին, որը նա օգտագործում է խաղաղ բնակչության դեմ, մյուս կողմից հումանիտար օգնություն ուղարկի այդ բնակչությանը: Բնական է, որ պետք էր մերժել այդ հումանիտար օգնությունը: Սա գուցե արթնացնի Իսրայելի կառավարությանը, որ հնարավոր չի խաղաղ բնակչության դեմ կիրառվող զենք մատակարարել Ադրբեջանին և մյուս կողմից այդ նույն բնակչությանն առաջարկել հումանիտար օգնություն:

Պատրիարքարանն այս օրերին այդ ուղղությամբ աշխատանքներ իրականացնո՞ւմ է: Նաև ի՞նչ է անում հայ համայնքը Իսրայելի իշխանություններին իր բողոքի ձայնը հասցնելու համար:

Մենք երեկ բողոքի քայլերթ ունեցանք Երուսաղեմում: Երթը մոտեցավ Իսրայելի վարչապետի բնակության վայրի մոտ, ապա նորից վերադարձավ հին քաղաք: Այդտեղ տարբեր լեզուներով ելույթներ եղան: Այսինքն գրեթե հնարավոր ամեն ինչ արել ենք: Բացի այդ, անցյալ շաբաթ պատրիարքը նամակով դիմեց հրեաների երկու քահանայապետերին, որպեսզի նրանք ևս իրենց հերթին դիմեն վարչապետին, խնդրեն հոգևոր տեսանկյունից, որ այդ զենքը չմատակարարվի Ադրբեջանին, որոնք խփում են Արցախի խաղաղ բնակչությանը: Այս պահին այնպես չի, որ մենք հանգիստ նստած ենք, ինչ հնարավոր է՝ արվում է մեր բողոքի ձայնը հասցնելու համար՝ ցույցեր, երթեր են կազմակերպվում, մշակութային ծրագրեր և այլն:

Իսրայելի իշխանությունները պատերազմից հետո ինչ-որ դիրքորոշում փոխե՞լ են: Ենթադրենք, որքանով է հնարավոր, որ հետագայում չեղարկվեն Ադրբեջանին զենք մատակարարելու գործարքները:

Կարծում եմ՝ այդ առումով իրենք չեն վերանայի իրենց պայմանագրերը, կշարունակեն զենքի վաճառքը, որովհետև այստեղ կա նաև տնտեսական բաղադրիչը: Մենք ցանկություն ունենք, որ վերանայվեն այդ պայմանագրերը, բայց այս պահի դրությամբ ոչ մի հիմք չկա նման զարգացման համար: Կարծում եմ, որ կշարունակվեն թե պայմանագրերի կատարումը, թե գուցե նաև նոր պայմանագրերի ստորագրումը:

Այսինքն այս կոչերը, Հայաստանից եկող պատասխանները իրավիճակի վրա մեծ ազդեցություն չե՞ն ունենա:

Այս պահի դրությամբ նման բան չի նշմարվում: Նույնիսկ երեկ առավոտյան ադրբեջանական ինքնաթիռը վայրէջք է կատարել իրենց ռազմական օդանավակայանում: Հավանաբար այնտեղից նորից զենք է տեղափոխվելու Ադրբեջան: Այդ բոլոր կոչերից, նամակներից, խնդրանքներից հետո, փաստորեն, զենքի մատակարարումը շարունակվում է:

Ընդհանրապես, հայկական դիվանագիտությունը վերջին տարիներին որքանո՞վ է ճիշտ աշխատել Իսրայելի իշխանությունների հետ, որքանո՞վ է այդ աշխատանքը եղել արդյունավետ:

Զենքի վաճառքի առումով միակ փոփոխությունը, որ մենք կարող էինք Իսրայելի կառավարությանը շահագրգռել, դա կլինի այն, որ մենք ևս այդ զենքից գնենք: Ուրիշ տարբերակ գոյություն չունի, և իրենք բացահայտ ասել են՝ մեզնից մի պահանջեք, որ մենք չվաճառենք, պատրաստ ենք ձեզ վաճառելու ավելի ցածր գնով: Այստեղ կան և տնտեսական շահեր, և Իսրայելի աշխարհաքաղաքական շահերը, որոնք հիմնականում համընկնում են Ադրբեջանի հետ: Իսրայելում հայկական դեսպանությունը պատերազմից ընդամենը 2 շաբաթ առաջ է բացվել, այդ ժամանակ նաև կարանտինը սկսվեց և շատ ժամանակ չկար, որ դեսպանատունը որևէ աշխատանք տաներ: Բայց նորից եմ կրկնում, որ իմ կարծիքով մենք որևէ փոփոխություն զենքի վաճառքի առումով չենք կարող անել: Միակ բանը, որ Իսրայելը կարող է մեզ առաջարկել, դա այն է, որ մեզ էլ կարող է զենք վաճառել:

Lragir.am