Վարչապետի կոշտ ուղերձն Իսրայելին. ցեղասպանության հեռակառավարողը

Հայաստանի վարչապետ Նիկոլ Փաշինյանը The Jerusalem Post-ին տված հարցազրույցում բավականին կոշտ գնահատականներ է հնչեցրել Արցախի դեմ թուրք-ահաբեկչական պատերազմին Իսրայելի մասնակցության առնչությամբ: Հայաստանի վարչապետը կոշտ ձեւով մերժել է նաեւ մարդասիրական օգնությունը, որի պատրաստակամությունը հայտնել է Իսրայել պետությունը: Փաշինյանը հայտարարել է, որ այդ օգնությունն էլ՝ ինչպես սպառազինություն են ուղարկում, թող ուղարկեն ահաբեկիչներին, որպես այդ քաղաքականության տրամաբանական շարունակություն: Հայաստանի վարչապետը նշել է, որ այդ քաղաքականությունն իհարկե Իսրայելի համար էլ կունենա բումերանգի էֆեկտ, երբ թուրք-ահաբեկչական դաշինքը կշրջվի դեպի Իսրայել պետություն:

Իսրայելն իհարկե լուծում է հենց այդ հարցը, «զբաղեցնելով» Էրդողանին այլ, ավելի հեռու պատերազմներով եւ սնուցելով նրա այդ պատերազմները, մասնավորապես տվյալ պարագայում Արցախի դեմ: Թյուր է թերեւս կարծիքը, թե Իսրայելին Ադրբեջանն այդ իմաստով հետաքրքրում է լոկ իբրեւ Իրանի դեմ հետախուզական պլացդարմ: Անշուշտ, դա էական նշանակության գործոն է, բայց Իսրայելի համար ոչ պակաս էական նշանակություն ունի այն, որ մերձավորարեւելյան ռեգիոնում նշանակալի գործոններն ու խաղացողները հնարավորինս երկար, հնարավորինս թեժ եւ բարդ գործընթացներում հայտնվեն իրենից հեռու:

Այստեղ իհարկե հարցը լոկ այդ խաղացողները չեն, որոնց Թել Ավիվը փորձում է գամել Կովկասում ստեղծվող ահաբեկչական ճահճին: Այստեղ էական նշանակություն ունի նաեւ Հայաստանը, որը դանդաղ, բայց սկսել էր վերադառնալ իր անվտանգության համար կենսական նշանակություն ունեցող մերձավորարեւելյան գոտի, որով հայկական գործոնը դարձնում է առավել ծանրակշիռ: Մի բան, որն Իսրայել պետության համար առաջացնում է անկասկած մեծ անհարմարություն՝ քաղաքականից մինչեւ հոգաբանական:

Հայկական քաղաքակրթական գործոնի հանդեպ ունեցած այդ քաղաքական-բարոյահոգեբանական մեղմ ասած «անհարմարությունն» է խթանը, որ Հոլոքոսթի ողբերգությունն ապրած ժողովրդի կառավարությանը դարձրել է հայ ժողովրդի ցեղասպանության նոր փորձի սնուցող եւ հեռակառավարող:

Այդ իմաստով, Իսրայելից մարդասիրական օգնության մերժումը Երեւանի գերճշգրիտ քայլն էր, ի պատասխան Ադրբեջանին արցախյան բնակավայրերը խոցելու եւ խաղաղ բնակիչներին թիրախավորելու գերճշգրիտ սպառազինության մատակարարման ներքո ծաղկող Իսրայել պետության կառավարության ցինիզմի: Երեւանը թույլ չի տվել Իսրայելին լեգիտիմացնել հայ ժողովրդի դեմ սեփական հանցանքը: Նույնն այդ կառավարությանը չպետք է թույլ տա Իսրայելի ժողովուրդը: