Ֆրանսիայից ու ՌԴ-ից հետո՝ ուժեղ հարված Ավստրիային. Էրդողանը ճնշում է գործադրում բոլոր ուղղություններով

Ավստրիայի մայրաքաղաք Վիեննայի կենտրոնում անհայտ անձը մի քանի կրակոց է արձակել և պայթեցրել իրեն: Սպանվել է մի քանի մարդ: Լրատվամիջոցները հայտնել են, որ ահաբեկիչները քաղաքի մյուս ծայրում գտնվող ճապոնական ռեստորանում պատանդ են վերցրել մի խումբ մարդկանց։ Ահաբեկիչների հետ փոխհրաձգության հետևանքով ոստիկաններից մեկը սպանվել է։ Ահաբեկչություն է իրականացվել քաղաքի միանգամից մի քանի վայրերում։

Մի քանի օր առաջ ահաբեկչություններ են կատարվել Ֆրանսիայի քաղաքներում, մարդկանց սպանել են ու գլխատել: Ահաբեկություններ են կատարվել Ռուսաստանում՝ Թաթարստանում եւ Դաղստանում:

Կասկած չկա, որ այս ահաբեկությունները սերտ կապ ունեն Անկարայի հետ: Բանն այն է, որ տեւական ժամանակ Էրդողանը փորձում է հանդես գալ իսլամական աշխարհի գլոբալ առաջնորդի դերում, հովանավորելով ու վերահսկելով ահաբեկչական տարբեր կազմակերպությունների: Ընդ որում, թիրախները նույնպես վկայում են այդ մասին: Մասնավորապես, Ֆրանսիան ընդդիմանում է Թուրքիայի ծրագրերին Արեւելյան Միջերկրականում եւ հանդես է գալիս Արցախի ճանաչման օգտին, այդ երկրի խորհրդարան է ներկայացվել ճանաչման օրինագիծ:

Իր հերթին, Ավստրիայի խորհրդարանը դատապարտել է Թուրքիայի ներգրավվածությունը Արցախի դեմ պատերազմին եւ զենքի մատակարարումներն Ադրբեջանին:

Ռուսաստանի պարագայում Թուրքիան փորձում է լուծել իր խնդիրները Լիբիայում ու Սիրիայում, հասնել հավասար դիրքերի Հարավային Կովկասում, մասնավորապես Արցախի հարցում բանակցային գործընթացին ներգրավվելու միջոցով: Այդ նպատակն էր հետապնդում նաեւ օրերս Ուկրաինայի հետ ռազմական համագործակցության պայմանագրի ստորագրումն ու Ղրիմի մասին հայտարարությունները: Ընդ որում, Թուրքիան Ռուսաստանի դեմ օգտագործում է նաեւ սեւծովյան նեղուցների խնդիրը եւ ցուցադրել է Ղրիմի «օդը փակելու» կարողությունը, եւ որ հատկանշական է՝ Ռուսաստանից գնած c 400 հակաօդային համալիրների միջոցով, ինչպես պնդում են ռուս ռազմական փորձագետները:

Ինչպես նշում է Կրեմլի ոչ պաշտոնական խոսնակ Ժիրինովսկին, Թուրքիան 5 միլիոն գործակալ ու զինվոր ունի Գերմանիայում, 2 միլիոն՝ Ռուսաստանում, նկատի ունենալով թուրք եւ ադրբեջանցի բնակչությանը: