ՍԱՊԾ-ը լռում է` հավատարիմ մնալով իր «չաշխատելու» սկզբունքին

Էդգար Խաչատրյանն իր ֆեյսբուքյան էջում գրում  է.

Համացանցում և ԶԼՄ-ներում շարունակվում է ակտիվ քննարկվել Թուրքիայից Հայաստան ներկրված ճտերի հարցը: Ավելի քան մեկ շաբաթ գրեթե բոլորը կոչ են անում Սննդամթերքի անվտանգության պետական ծառայությանն ի վերջո պարզաբանել՝ ինչպե՞ս ստացվեց, որ չնայած հրամանով արգելքը չի տարածվում մինչև ապրիլի 23-ը Թուրքիայից արտահանված մթերքի վրա (այսինքն՝ տարածվում է ապրիլի 23-ից հետո արտահանված բոլոր մթերքների վրա), սակայն մայիսի 6-ին Հայաստան Թուրքիայից թռչուն է ներմուծվում: Ադրբեջանն արգելում է 5-ին, մենք՝ 7-ին, արդյո՞ք սա միտումնավոր չի արվել՝ կոռուպցիոն պայմանավորվածություններից ելնելով: Եթե այդքան հեշտ է տարբերակել՝ կենդանին հիվանդ է, թե՝ առողջ, և առանց խնդիրներ ունենալու կարելի է ներկրում իրականացնել, ո՞րն էր անհրաժեշտությունն արգելք սահմանելու:

Բոլորը կոչ են անում, իսկ ՍԱՊԾ-ն անում է ընդամենը մեկ հայտարարություն այն մասին, որ պատրաստ է համագործակցության, բայց այդպես էլ մինչ օրս չի պատասխանում բարձրաձայնված հարցերին: Ծառայության լռությունն արժանացավ խիստ քննադատության, առանձին դեպքերում հասավ մինչև վիրավորանքների, իսկ նրանք լռում են՝ հավատարիմ մնալով իրենց հիմնական՝ «չաշխատելու» սկզբունքին:

Հավանաբար Ծառայությունում կարծում են, որ միևնույն թեման դժվար թե շարունակի այդքան երկար մնալ հասարակության ուշադրության կենտրոնում, և մի օր աղմուկն ինքն իրեն կավարտվի և ամեն ինչ կսկսի նորից, նոր մաքուր էջից: Միգուցե հնարավոր է, սակայն գրանցվող դեպքերը հասել են խայտառակ մակարդակի, և այս անգործությունը հատում է անգամ բարոյականության շեմը: