Ռուսաստանի համար ծուղակ է սա. քաղաքագիտության պրոֆեսոր

Ankakh.com-ը գրում է .

Երբ երկրորդ աշխարհամարտից հետո առաջացավ երկբևեռ աշխարհակարգը, շուրջ կես դար Արևմուտքը համառորեն ելքեր էր փնտրում Արևելք բևեռը կազմաքանդելու համար: Երկաթյա վարագույրի չեզոքացման համար Չերչիլից և Թրումանից մինչև Բուշ Ավագ ինչեր ասես որ չարվեցին:

Գաղափարական, հոգեբանական, տնտեսական, ռազմական, քաղաքական ճնշումներ, պատաժամիջոցներ, վիետնամական պատերազմ, սպառազինությունների մրցավազքի պարտադրում և այլն , և այլն: Մեր հասարակության միջին և ավագ սերնդի մարդիկ ապրելով ԽՍՀՄ-ում ականատես են եղել այդ քաղաքական գործընթացներին: ԽՍՀՄ-ը և նրա ազդեցության տակ գտնվող սոցիալիստական ճամբարը, ես կասեի որ բավականին հաջող դիմակայում էր: Գիտեք մինչև երբ...մինչև որ ԱՄՆ-ի հատուկ ծառայությունների և քաղաքական հետախուզության գլխավորությամբ ավարտին հասցվեց այն փայլուն ծրագիրը, որի բովանդակությունը կարելի է շարադրել թերևս մեկ նախադասությամբ. ստեղծել այնպիսի ծուղակ, որտեղ Կրեմլի անհեռատես կոմունիստ ղեկավարները կայսերապետական փառասիրությամբ տառապելով կնետվեն զրոյական գումարի խաղի կանոններով և մոտ 10-20տարվա ընթացքում կմաշեն ու կվատնեն հզոր պետության բոլոր ռեսուրսները ու կհասնեն ինքնափլուզման եզրին:

Ինչպես տեսանք 1989-90 թթ. ծրագիրն ավարտվեց Արևմուտքի հաղթանակով: Հիմա ըստ էության: Երբ 90-ական թթ. զիջող ու ենթարկվող Ռուսաստանին փոխարինեց հակադրվող պուտինյան Ռուսաստանը, երբ պարզվեց, որ նավթի շատ բարձր գների հետևանքով շուրջ 10 տարի այստեղ կուտակվել են հսկայական ռեսուրսներ /ռազմական և տնտեսական/, երբ ակնհայտ դարձավ որ Արևմտյան ռազմական ու տնտեսական կառույցների ծավալումը կասեցնող ռուսական ուժ կա, նորից վերակենդանացավ <<ծուղակ>> գործողությունը: Կարելի է ենթադրել, որ սիրիական ճակատը գոհունակությամբ Ռուսաստանին թողնողները, ուկրաինական ճգնաժամի հսկայական բեռը Կրեմլին նվիրողները, որոնք օր-օրի խստացնում են պատժամիջոցները, իջեցնում են նավթի գները, պայմաններ են ստեղծում ռուսական ռեսուրսների փոշիացման համար: Իրենք քանդեցին Ռուսաստանի դաշնակից հզոր Իրաքն ու Սիրիան, այժմ ռուսներին տանում են իրենց կողմից ծնված ու սնված ահաբեկիչներին վերացնելու ծախսատար ու երկարատև օպերացիաների իրականացման: Ռուսական հեռուստաընկերություններն էլ լցված են հրճվանքով լեցուն հաղորդումներով: Ռուսաստանի համար ծուղակ է սա:

Միթե հզոր ՆԱՏՕ-ն, նրա տարածաշրջանային դաշնակիցները այնքան թույլ էին, որ չկարողացան Իսլամական պետության դեմ: Հիշենք. Սադամ Հուսեյնի մեկ միլիոնանոց արդիական բանակը ջախջախվեց մեկ ամսում: Հիմա էլ թալիբներն են ակտիվացել Աֆղանստանում: Վախենամ թե դա էլ նվիրեն Ռուսաստանին: Շատ կուզեի սխալված լինել իմ կանխատեսումների մեջ: Հայաստանի ռազմավարական դաշնակցի հզորության պահպանումը նաև մեր գոյության համար է կարևոր: Այնպես որ <<ծուղակ>> օպերացիային պետք է ուշադիր հետևել և ունենալ պահեստային դիրքորոշումներ քաղաքական իրադրության փոփոխման դեպքում: Գարիկ Քեռյան քաղաքագիտության պրոֆեսոր