Թղթե թափոնները հանձնում են վերամշակման, գումարն ուղղում ՊՆ հիմնադրամին. «Փաստ»
Մամուլ
«Փաստ» օրաթերթը գրում է
Պատերազմական ծանր օրերին յուրաքանչյուրն է ուզում ինչ-որ բանով օգտակար լինել հայկական զինված ուժերին, արցախցի ընտանիքներին, որոնք ստիպված են ժամանակավոր բնակություն հաստատել Հայաստանում։ Ուշադրության կենտրոնում են բոլորը։ Եվ հենց այս ընթացքում է, որ բազմաթիվ հասարակական նախաձեռնությունների հիմք է դրվում։ Օրինակ՝ արդեն մի քանի օր է, ինչ Երևանում «Թուղթը վերածենք զենքի» նախաձեռնության անդամները հավաքագրում են թուղթ, հանձնում համապատասխան կազմակերպությանը, իսկ հավաքված ողջ գումարն ուղղվում է այս օրերի ամենակարևոր նպատակին:
Նախաձեռնության ղեկավար Արթուր Օհանյանը նշում է՝ բոլորիս տներում էլ կան թղթի թափոններ, որոնք, թվում է՝ որևէ բանի պիտանի չեն, բայց իրականում դրանք շատ մեծ նպատակի կարող են ծառայել: Ասում է՝ 12-13 օր է, ինչ թուղթ են հավաքագրում։ «Առաջին շաբաթում հավաքված թուղթը հանձնել ենք վերամշակման և գոյացած ողջ գումարը՝ 345 հազար դրամը, փոխանցել պաշտպանության նախարարության հիմնադրամին: Ընդ որում, առաջին շաբաթում նախաձեռնությունը դեռ այն արձագանքը չէր ստացել, ինչ հաջորդ օրերին։ Այս շաբաթվա վերջում նորից փոխանցում կկատարվի, և մեր էջում կտեղեկացնենք, թե որքան գումար ենք փոխանցել այս անգամ։ Հավաքագրած թղթի ծավալով արդեն հասել ենք մոտ տասը տոննայի։
Բացի դա, Մաշտոցի պուրակում նոր ակցիա սկսեցինք։ Քանի որ թափոնների մեջ շատ էին գրքերը, և հաճախ դրանք ափսոսում էինք որպես մակուլատուրա հանձնել, որոշեցինք վաճառքհանգանակություն կազմակերպել։ Այսինքն՝ որևէ ֆիքսված գին չենք սահմանել գրքերի համար։ Դրված է արկղ, մարդիկ մոտենում են, փնտրում ու գտնում են իրենց ցանկացած գիրքը և ցանկացած չափով հանգանակություն են կատարում, ինչը նույնպես ուղղվելու է պաշտպանության նախարարության հիմնադրամին»,-«Փաստի» հետ զրույցում ասում է Արթուրը: Արդեն իսկ թուղթ են հավաքագրում ոչ միայն Երևանում, այլ նաև մարզերում՝ Վանաձորում, Գյումրիում, Էջմիածնում, Հրազդանում և այլուր։
«Հասցեները նշված են մեր ֆեյսբուքյան էջում, նշված են նաև նախաձեռնության մարզային համակարգողների հեռախոսահամարները, կարող են կապ հաստատել, ճշտել մանրամասները։ Այս ամբողջ աշխատանքն արվում է կամավորության սկզբունքով, ունենք թիմ, որը Մաշտոցի պուրակում տեսակավորում է հավաքագրված թուղթը և հանձնում վերամշակման գնորդին, ում հետ նախապես պայմանավորվածություն ենք ձեռք բերել։ Երբեմն կարծիք է հնչում՝ մեկ կամ երկու կիլոգրամ թուղթն ինչո՞վ կարող է օգնել: Իրականում մեկ, երկու կամ հինգ կիլոգրամներով է, որ արդեն մոտենում ենք հավաքված 10 տոննա թղթի շեմին։ Համագործակցել ենք ոչ միայն պետական կառույցների կամ կազմակերպությունների, այլ նաև քաղաքացիների հետ, որոնք կարող են երեք գիրք կամ մի քանի տետր բերել։
Մենք նաև նրանց օգնությամբ ենք հասել այս արդյունքին։ Իհարկե, կազմակերպությունների և պետական կառույցների ներգրավվածությունը շատ մեծ է, բայց ամեն դեպքում անհատները, մեր հասարակությունը իրենց մեծ դերն է ունեցել այս հարցում»,նշում է մեր զրուցակիցը: Հետաքրքրվում եմ՝ դեռ որքա՞ն կշարունակվի այս նախաձեռնությունը, արդյոք «կգործեն» նաև պատերազմի ավարտից հետո: «Քանի դեռ քաղաքացիների արձագանքը և ներգրավվածությունն այս գործին այսպիսին է, շարունակելու ենք։ Աստված տա, պատերազմը շատ շուտ ավարտվի, եթե անգամ րոպե առաջ ավարտվի, շարունակելու ենք այս նախաձեռնությունը, քանի որ կարողանում ենք ինչ-որ բանով օգտակար լինել։
Բացի դա, պատերազմից հետո պետք է վերականգնել բոլոր վնասները, երկար ժամանակ լինելու ենք հետպատերազմական շրջանում, և բնական է, որ այդ վերականգնմանը պետք է ներգրավվածություն ունենանք։ Չմտածենք՝ պատերազմը վերջացավ, մենք էլ գործ չունենք, այդպես չի կարող լինել։ Պետք է մեր դերն ունենանք հետպատերազմական շրջանի վերականգնման գործընթացում։ Քանի դեռ ձնագունդը գլորվում է, շարունակելու ենք գործել»,-եզրափակում է Արթուր Օհանյանը:
Մանրամասները՝ «Փաստ» օրաթերթի այսօրվա համարում
1
2
3
4
5
1
2
3
4
5
1
2
4
5
