Ադրբեջանը հայտնում է զինծառայողի զոհվելու մասի

Ադրբեջանի պաշտպանության նախարարության մամուլի ծառայությունը հայտարարություն է տարածել զինծառայող Էլշան Իսմայիլովի զոհվելու մասին:

Ինչպես հաղորդում է «Արմենպրես»-ը' վկայակոչելով ադրբեջանական ԶԼՄ-ները, Ադրբեջանի ՊՆ համաձայն' Էլշան Իսմայիլովը զոհվել է «շփման գծում մարտերի արդյունքում»: Ադրբեջանի ՊՆ-ը չի հայտնել զինծառայողի զոհվելու վայրն ու հանգամանքները:

Ադրբեջանի պաշտպանության նախարար Զաքիր Հասանովի հրամանագրով զոհված զինվորը հետմահու պարգևատրվել է «Գերազանց զինծառայության համար» երրորդ աստիճանի շքանշանով:

Ադրբեջանի ՊՆ մամուլի ծառայությունն օրվա առաջին կեսին հայտնել էր ադրբեջանական բանակի պայմանագրային զինծառայող Բահրուզ Նասիբովի վիրավորվելու մասին:

Ադրբեջանի ՊՆ համաձայն' Բահրուզ Նասիբովը վիրավորվել է «շփման գծում հայկական ստորաբաժանումների հետ մարտերում»: ՊՆ մամուլի ծառայությունը չի նշել, թե հատկապես որտեղ են ընթացել այդ «մարտերը»:

ԼՂՀ ՊՆ մամուլի ծառայությունը հայտնել է, որ վերջին երկու օրերին ղարաբաղյան և ադրբեջանական ուժերի շփման գծում գրանցվել է Ադրբեջանի ԶՈւ կողմից հրադադարի ռեժիմը խախտելու 115 դեպք: Ադրբեջանական կողմը տարբեր տրամաչափի հրաձգային զենքերից եւ ԱԳՍ-17 տեսակի նռնականետերից 1800 կրակոցներ են արձակել հայկական դիրքերի վրա:

ԼՂՀ պաշտպանության բանակի ստորաբաժանումները շարունակում են առաջնամասում լիակատար վերահսկողություն իրագործել և անհրաժեշտ միջոցառումներ են ձեռնարկում մարտական դիրքերի հուսալի պաշտպանությունը կազմակերպելու նպատակով:

ՀՀ ՊՆ և ԼՂՀ ՊԲ կողմից սեփական միջոցներով ձեռք բերված տեղեկությունների, ինչպես նաեւ ոչ պաշտոնական աղբյուրների և սոցցանցերի հաղորդագրությունների համաձայն՝ տարվա սկզբից մինչ այժմ ադրբեջանական բանակի կորուստը կազմել է առնվազը 132 զինծառայող և 144-ից ավելի վիրավոր: