Ֆրանսիայի դերը հակամարտության կարգավորման հարցում

Մինսկի խմբի դերի և կարևորության  և կատարած աշխատանքի մասին շատերն են խոսում և ցանկանում հասկանալ, թե ինչ քայլեր են արվում հակամարտության խաղաղ կարգավորման համար:

Pressmedia.am-ը ներկայացնում է համանախագահող երկիր Ֆրանսիայի կատարած աշխատանքը:

Նախ ֆրանսիայի նախագահ Էմանուել Մակրոնը հանդես եկավ հայտարարությամբ և կոչ արեց երկու կողմերին դադարեցնել կրակը՝ անընդունելի համարելով ռազմական ճանապարհով խնդրի լուծումը: Շատ չուշացավ համանախագահների հայտարարությոնը, որով կրկին դատապարտում էին ռազմական ճանապարհով հարցի լուծմանը հասնելը, ապա նաև կոչ անում երրորդ երկրին՝ Թուրքիային` չմիջամտել: 
Օրեր անց Մակրոնն ասաց, որ տեղեկություն ունի Թուրքիայի միջամտությամբ Ադրբեջանի սահման ներթափանցող ահաբեկիչների տեղաշարժի մասին: Ֆրանսիայի նախագահին հատկապես վրդովեցրել էր Արդբեջանի կողմից լրագրողներին թիրախավորելու փաստը: Վիրավորների թվում էր նաև ֆրանսիացի լրագրողը:

Համացանցում աչքի են ընկնում նաև Փարիզի քաղաքապետ Անն Իդալգոնի հայտարարությունները: Նա Nouvelles d`Armenie-ին տված հարցազրույցում նշել է. «Պաշտոնական Բաքուն ակնհայտորեն ագրեսոր է Լեռնային Ղարաբաղի հակամարտությունում, որին աջակցում է Թուրքիան: Ուստի` Բաքվի ռեժիմը շատ մեծ պատասխանատվություն է կրում»:

Փարիզի քաղաքապետը նաև նշել է, որ պատրաստվում է 2021 թվականի սկզբին այցելել Երևան: Անն Իդալգոնը մանրամասնել է, թե ինչպես կարող է Փարիզը աջակցել Երևանին. «Ես նախագահում եմ Ֆրանկոֆոն քաղաքապետերի միջազգային ասոցիացիան (AIMF), որի անդամ է, իհարկե, Երևանը: Ես խնդրեցի, որ AIMF-ն անմիջապես մշակի 50 հազար եվրոյի շտապ օգնություն՝ Արցախից տեղափոխվածներին աջակցելու և առողջական ճգնաժամը հաղթահարելու համար: Սա առաջին քայլն է: Միջազգային հարաբերությունների գծով իմ տեղակալ Առնո Նգաչան մշտական կապի մեջ է Փարիզում Հայաստանի դեսպանի, ինչպես նաև Ֆրանսիայի հայկական կազմակերպությունները համակարգող խորհրդի երկու համանախագահների հետ»: 

Նույն պարբերականին տրված հարցազրույցներից մեկում էլ Փարիզի քաղաքապետը անդրադարձել է Էրդողանի վարած քաղաքականությանը. «Թուրքիայի նախագահ Ռեջեփ Թայիփ Էրդողանի ռեժիմը գործում է ազգայնական ոգով, ժխտում Հայոց ցեղասպանության իրողությունը և, կարծես, խրախուսում Լեռնային Ղարաբաղի բնակչության նկատմամբ էթնիկ զտման փորձերի իրականացումը: Մենք դեռևս չենք հասել Լեռնային Ղարաբաղի հակամարտության կարգավորմանը, բայց կարող էինք հասնել, և ես ցուցաբերում եմ յուրահատուկ զգոնություն: Թուրքիայի ներգրավումը հայերի դեմ հակամարտության մեջ, ցավոք, արթնացնում է ցեղասպանության հիշողությունը ինչպես Հայաստանում, այնպես էլ Սփյուռքում»,- ասել է Անն Իդալգոն»:

Հիշեցնենք, որ երկրորդ անգամ հրադադարի ռեժիմի պայմանավորվածությունը ձեռք է բերվել Ֆրանսիայի միջամտությամբ, որը կրկին հոկտեմբերի 18-ին՝ 00:05 րոպեին, խախտվել է Ադրբեջանի կողմից: Նախորդ անգամ էլ հակառակորդը հրադադարը խախտել էր 5 րոպե անց:

Կարևոր է նաև հանգամանքը, որ ֆրանսիահայերը գրեթե ամեն օր Ֆրանսիայի տարբեր քաղաքներում բողոքի ակցիա են իրականացնում՝ պահանջելով հստակ գործողություններ:

Մինչ այժմ Ֆրանսիայից Հայաստան է ուղարկվել մեծաքանակ մարդասիրական օգնություն:

Աննա Ավետիսյան

Pressmedia.am