ԱՆ-ն զգուշացնում է նաև Իրանին. Ռիսկերը մեծ են

Առողջապահության նախարարությունն ահազանգում է, թե ինչ առողջական խնդիրների, վարակների տարածման կբերի մարդասիրական հրադադարի տևական խախտումը:

Մոսկվայի միջորդությամբ՝ Հայաստանի և Ադրբեջանի ԱԳ նախարարների համաձայնությամբ, ձեռք էր բերվել մարդասիրական հրադադար, որով հոկտեմբերի 10-ին, ժամը 12:00-ից պետք է դադարեր կրակը՝ դիակների և գերիների հանձնման համար, այն 12:05-ին խախտեց ադրբեջանական կողմը, կրկին ձեռք բերվեց հրադադարի պայմանավորվածություն, ըստ որի հեկտեմբերի 18-ին՝ 00:00-ից հայտարարվում է մարդասիրական հրադադար: Ադրբեջանական կողմը այն կրկին խախտեց 00:05-ին:

ՀՀ Ան-ն հայտնում է, որ բազմաթիվ են զոհերը, որոնք հղի են հատուկ վտանգավոր բռնկումների և համաճարակների առաջացման վտանգով. «Ջրամատակարարման և ջրահեռացման համակարգերի վնասվելն առաջացնում է անբարենպաստ սանիտարահիգիենիկ իրավիճակ և անհնարին դարձնում պատշաճ մաքրման և ախտահանման աջխատանքների իրականացումը՝ նպաստավոր պայմաններ ստեղծելով աղիքային վարակիչ հիվանդությունների (խոլերա, հեպատիտ Ա, դիզենտերիա և այլն) առաջացման և տարածման համար: Պատերազմական գոտին անցնում է Զանգեզուր-Ղարաբաղյան և Մերձարաքսյան ժանտախտի բնական օջախների տարածքներով, որտեղ առկա են ինչպես հիվանդության հարուցիչները, այնպես էլ՝ փոխանցողները: Զոհվածների մարմինների դուրս բերումը՝ հուղարկավորության կամ փոխանակման համար, նախապայմանների բացակայությունը նպաստում է, որ առանց խնամքի մնացած դիակները դառնան վարակիչ հիվանդություններ փոխանցող կամ բնական պահոց հանդիսացող միջատների և վայրի կենդանիների սնվելու և բազմանալու բարենպաստ միջավայր, իսկ վարակիչ, այդ թվում հատուկ վտանգավոր, հիվանդությունների հարուցիչները կարող են երկարատև կենսունակ մնալ շրջակա միջավայրում, ինչը ստեղծում է բռնկումների և համաճարակների առաջացման բոլոր նախադրյալները»:

Նման օրինակներ համաշխարհային պրակտիկայում քիչ չեն՝ սկսած դեռ հին ժամանակներից: Նույն վտանգի առաջ է կանգնած նաև Ադրբեջանը, բայց կարծես՝ նա լուծումը գտել է: Հիշեցնենք, որ համացանցում հայտնվել էր տեսանյութ, որում երևում էր, թե ադրբեջանական կողմը ինչպես է դիակները նետում ջուրը:

ՀՀ ԱՆ-ն նաև հրավիրում է տարածաշրջանի՝ հատկապես Իրանի Իսլամական Հանրպետության ուշադրությունը: «Շրջակա միջավայրի աղտոտումը, վարակիչ հիվանդություններ տարածող կրծողների բազմացումը լուրջ համաճարակային սպառնալիք է ոչ միայն անմիջական ռազմական գործողությունների շրջանների համար, այլև հակամարտող կողմերի հետ անմիջական հարևանությամբ գտնվող երկրների, մասնավորապես, Իրանի Իսլամական Հանրապետության համար՝ հաշվի առնելով երկրների միջև ոչ մեծ հեռավորությունը, աշխարհագրական ընդհանրությունը և առավել ռիսկային գոտի համարվող Արաքս գետի առկայությունը՝ վարակը ջրային ճանապարհով մերձարաքսյան բնակավայրեր տարածման առումով»,- նշված է ԱՆ հայտարարության մեջ:

Առողջապահության նախարարությունը վերահաստատում է, որ նման իրավիճակների առաջացման ողջ պատասխանատվությունը կրում է ադրբեջանական կողմը, քանզի հոկտեմբերի 10-ին կնքված հրադադարի ռեժիմը խախտողը հենց ադրբեջանական կողմն է, ինչն այդ երկրի բարձաստիճան պաշտոնյան չի էլ հերքում:

Աննա Ավետիսյան

Pressmedia.am