Ինչ կա չկա հրադադարից
«Հերթական անգամ խախտելով հումանիտար հրադադարը, հակառակորդը հյուսիսային ուղղությամբ` ժամը 00:04-ից 02:45-ն ընկած ժամանակահատվածում, վարել է հրետանային և հրաձգային կրակ, իսկ հարավային ուղղությամբ` ժամը 02:20-ից 02:45-ն ընկած ժամանակահատվածում` հասցրել է հրթիռային հարվածներ»։
«Ադրբեջանի զինված ուժերը հերթական անգամ կոպտորեն խախտել են նոր մարդասիրական հրադադարը: Ժամը 07: 20-ին` հրետանային ակտիվ կրակից հետո` հակառակորդը բարենպաստ դիրքեր գրավելու նպատակով , հարձակում է ձեռնարկել հարավային ուղղությամբ (Խուդաֆերինի ջրամբար): Երկուստեք կան զոհեր և վիրավորներ»:
Նման հայտարարություններ տարածեցին ՊՆ ներկայացուցիչ Արծրուն Հովհաննիսյանը և ՊՆ մամուլի խոսնակ Շուշան Ստեփանյանը: Հիշեցնենք, որ հոկտեմբերի 18-ին՝ ժամը 00:00-ից, ըստ ՀՀ և ԱՀ պայմանավորվածության՝ պետք է գործեր մարդասիրական հրադադար, ինչը արդեն երկրորդ անգամ խախտում է Ադրբեջանի Հանրապետությունը, ով փաստացի հայտարարված հրադադարը օգտագործում է ավելի բարենպաստ դիրքեր գրավելու համար: Ստեղծված իրավիճակը արդեն իսկ գաղտնիք չէ միջազգային կառույցների և լրատվամիջոցների համար: ՀՀ ԱԳՆ-ից հայտնել են, որ մարդասիրական հրադադար ձեռք բերելուց հետո՝ Կարմիր խաչի միջազգային կոմիտեի միջնորդությամբ փորձ է արվել պայմանավորվածություն ձեռք բերել գիշերվա ընթացքում վիրավոր զինծառայողներին մարտադաշտից դուրս բերելու համար։ Սակայն այս քայլը կտրականապես մերժվել է պաշտոնական Բաքվի կողմից։ ՀՀ ԱԳՆ-ն նաև հայտարարում է, որ ալիևյան կլանը մտահոգված է միայն սեփական իշխանության պահպանմամբ «… և սարսափելով պատերազմ սանձազերծելու ու բազմաթիվ կորուստներ ունենալու համար իր սեփական ժողովրդի առջև պատասխան տալու հեռանկարից, փորձում է հետաձգել իրականության հետ առերեսվելու անխուսափելի պահը»:
Իրադարձությունները վաղուց դուրս են հակամարտող երեք երկրների տիրույթից, Արցախի դեմ սանձազերծած պատերազմը ակտիվորեն լուսաբանում են արտասահմանյան լրատվամիջոցները, որոնք, բնականաբար, անդրադաձել են հրադադարի ռեժիմի հերթական խախտմանը: BBC-ն մասնավորապես գրել է՝ Հայաստանը Ադրբեջանին մեղադրում է նոր զինադադարը խախտելու մեջ՝ պայմանավորվածությունն ուժի մեջ մտնելուց ընդամենը րոպեներ անց: Նշվում է, որ Ադրբեջանը դեռ պետք է պատասխանի մեղադրանքներին: AlJazeera-ն, հղում կատարելով ՀՀ ՊՆ խոսնակ Շուշան Ստեփանյանին, գրել է, որ Ադրբեջանը կրկին հրետանային և հրթիռային կրակ է վարել: Լրատվամիջոցը նկատել է, որ Ադրբեջանի պաշտպանության նախարարությունը ավելի ուշ է մեղադրել հայկական կողմին հրադադարի պայմանավորվածությունը խախտելու մեջ: France 24-ը ևս տեղեկացրել է՝ մարտերը Լեռնային Ղարաբաղում շարունակվում են, Հայաստանը մեղադրում է Ադրբեջանին զինադադարը խախտելու մեջ: Ադրբեջանի կողմից հրադադարի խախտման մասին գրել են նաև ռուսական հեղինակավոր գրեթե բոլոր լրատվամիջոցները: Հեղինակավոր պարբերակնների հրապարակումները թարգմանել է hraparak.am-ը:
Ադրբեջանի կողմից հրադադարի ռեժիմի խախտմանն է անդրադարձել նաև Արցախի ՄԻՊ Արտակ Բեգլարյանը և նշել, որ Ադրբեջանի համար որևէ արժեք չունեն մարդկային կյանքներն ու իր զինծառայողների մարմինները. «Ո՞րևէ արձագանք Ադրբեջանի կողմից մարդասիրական հրադադարի այս նոր խախտման վերաբերյալ: Կարծես այս երկիրը թքած ունի մարդկային կյանքերի և զինծառայողների մարմինների վրա»: Բեգլարյանը նաև կոչ է արել՝ չլինել կույր, ճանաչել Արցախի անկախությունը:
Աննա Ավետիսյան
1
2
3
4
5
1
2
3
4
5
1
2
3
4
5
