Թուրքական F-16 կործանիչները Թուրքիայից Ադրբեջան ու հակառակ ուղղությամբ թռչել են Վրաստանի օդային տարածքով

Թուրքական F-16 կործանիչներն Ադրբեջանի տարածքում հայտնվել են դեռ հուլիս ամսին, թուրք-ադրբեջանական լայնամասշտաբ ռազմավարական զորավարժություններին նախապատրաստման նախօրեին:

Այդ ընթացքում նշված ինքնաթիռներն ակտիվ գործողություններ են իրականացրել, ուսումնամարզական, ուսումնամարտական թռիչքներ են իրականացրել Հայաստանի ու Արցախի պետական սահմանի ամբողջ երկայնքով, հհիմնականում թիրախավորելով Գյանջա-Վարդենիս, Գյանջա-Քարվաճառ, Գյանջա-Մարտակերտ, Ստեփանակերտ, Հադրութ ուղղությունները:

Զորավարժություններից հետո դրանք Թուրքիա չեն վերադարձել, մնացել են Գյանջայում: Այս մասին մամուլի ասուլիսի ժամանակ հայտարարեց Հակաօդային պաշտպանության զորքերի հրամանատարի տեղակալ Գարիկ Մովսեսյանը։

Սեպտեմբերի 23-ին Թուրքիայի ռազմաօդային ուժերի հրամանատարությունն իրականացրել է այդ F-16-ների, դրանց անձնակազմերի, տեխնիկական կազմի հերթափոխ. «Թուրքիայի տարածքից Ադրբեջանի տարածք թռիչքներն իրականացվել են Վրաստանի օդային տարածքով»:

Սեպտեմբերի 23-ին, ժամը 16:00-ին հերթափոխ կատարած ինքնաթիռները Գյանջայից թռիչք են կատարել, Վրաստանի տարածքով անցել ու տեղակայվել իրենց բազավորման օդակայան. «Ադրբեջանի կողմից նույն թվականի սեպտեմբերի 27-ին սանձազերծած լայնամասշտաբ հարձակողական գործողությունների սկզբից, հենց առաջին օրվանից Թուրքիայի F-16 ինքնաթիռներն ակտիվորեն ներգրավված են եղել օդից խնդիրների կատարմանը՝ Հայաստանի ու Արցախի տարածքների ու օբյեկտների ռմբակոծմանն ու հրթիռակոծմանը»: