Չպետք է թույլ տանք, որ մեր երկիրը դարձնեն խաղավայր. Րաֆֆի Հովհաննիսյան (լուսանկարներ)

Հիմա ուզում են Հայաստանի Հանրապետությունը դարձնել կուսակցապետություն, որտեղ ողջ համակարգը վերից վար ենթարկվում է ոչ թե քաղաքացուն, այլ մի կուսակցության: Այս մասին, այսօր՝ նոյեմբերի 28-ին, Վանաձոր քաղաքում «Նոր Հայաստան» նախաձեռնության կազմակերպած հանրահավաքի ժամանակ նշել է «Ժառանգություն» կուսակցության առաջնորդ Րաֆֆի Հովհաննիսյանը։

NEWS.am-ի թղթակիցը հաղորդում է, որ ի տարբերություն նախորդ օրերի` հանրահավաքն այսօր ավելի մարդաշատ էր:

«Մենք այստեղ ենք ոչ թե որպես առաջնորդներ, այլ որպես շարքային քաղաքացիներ, ձեր կողքին կանգնելու ու ասելու, որ թույլ չենք տալու, որ Վանաձորը դատարկվի, մեր աշխատանքը, տղաներին, արժանապատվությունը մեզնից խլեն եւ մեր հանրապետությունը դարձնեն հատվածաբար փոքր մարդկանց խաղավայր»,-  հավաքվածներին ասել է Րաֆֆի Հովհաննիսյանը։

Վանաձորի ՀԱԿ-ի գրասենյակի ներկայացուցիչ Սարգիս Թամազյանի խոսքով էլ ժողովուրդը վճռական է տրամադրված եւ պատրաստ է լուրջ պայքար մղելու. «Դեկտեմբերի 6-ին մեզ անհրաժեշտ է գնալ քվեարկության եւ այդ քվեարկությամբ մեր «Ոչ»-ն առարկայացնել»:

Շուրջ մեկ ժամ տեւած հանրահավաքի ավարտին բանախոսները եւս մեկ անգամ վանաձորցիներին հորդորեցին դեկտեմբերի 1-ին անպայման գնալ Երեւանի Ազատության հրապարակ:

Նշենք, որ նախքան հանրահավաքը «Նոր Հայաստանի» ներկայացուցիչները մասնակիցները երթով անցան քաղաքի գլխավոր պողոտայով, ապա վերադարձան Արցախ պուրակ, որտեղ եւ մեկնարկեց հանրահավաքը: