Ադրբեջանը և Թուրքիան, եթե շարունակեն այս բռնությունը` մենք պատրաստ ենք Արցախը անկախ պետություն ճանաչել
ԱՄՆ կոնգրեսական Ադամ Շիֆն՝ անդրադառնալով Արցախա-ադրբեջանական սահմանին ընթացող պատերազմին, ֆեյսբուք սոցիալական ցանցի իր միկրոբլոգում գրել է, որ Արցախի բնակիչների վրա ադրբեջանական առաջին ռումբերն ընկնելուց մի քանի շաբաթ անց հարյուրավոր մարդիկ են սպանվել, վիրավորվել, հազարավոր մարդիկ ստիպված են եղել լքել իրենց տները: «Ռմբակոծվել և ավերվել են Արցախի քաղաքներ, պատմական եկեղեցիներ, իսկ Սիրիայից ժամանած վարձկան զինյալներին Ադրբեջանը և նրա թուրք հովանավորները օգտագործում են մարտի դաշտում: Եվ, չնայած այս անօրինական պատերազմին՝ Արցախի և Հայաստանի ժողովուրդը դեռ կանգնած է, իսկ մենք կշարունակենք աջակցել նրանց: Այս պատերազմն արդյունք է այն բանի, որ Բաքվում կոռումպացված ռեժիմը իր ժողովրդին դաժան էթնո-ազգայնամոլություն է մատուցում՝ խաղաղության, բարեկեցության և ազատության փոխարեն»,- գրել է կոնգրեսականը:
Նա նաև նշել է, որ երկար ժամանակ Միացյալ Նահանգները, կեղծ հավասարության նշան դնելով Հայաստանի և Ադրբեջանի միջև, թույլ է տվել Ադրբեջանին հարձակումը հարձակման հետևից իրականացնել: «Կարծում եմ, որ Միացյալ Նահանգները պետք է Ադրբեջանին և Թուրքիային հասկացնեն, որ եթե նրանք շարունակեն այս բռնությունը` հակամարտության խաղաղ կարգավորմանը ձգտելու փոխարեն, մենք պատրաստ ենք Արցախի Հանրապետությունը անկախ պետություն ճանաչել: Նախագահներ Ալիևը եւ Էրդողանը պետք է հասկանան, որ բազմամյա սահմանային վեճը չեն կարող լուծել խաղաղ բնակչության դեմ ուժի անխնա կիրառմամբ, և Միացյալ Նահանգները դրա նկատմամբ անտարբեր չի մնալու»,- ասել է նա:
Անի Ասատրյան
1
2
3
4
5
1
2
3
4
5
1
2
3
4
5
