Հայաստանի հրեական համայնքը ևս ձեռքերը ծալած չի նստել
Ուշադրության կենտրոնում
Հայաստանի հրեական համայնքը ևս ձեռքերը ծալած չի նստել և նամակ է հղել Իսրայելի նախագահ Ռեուվեն Ռիվլինին, Իսրայելի վարչապետ Բենյամին Նեթանյահուին, Կնեսետի նախագահ Յարիվ Լևինին, կոչ անելով դադարեցնել զենքի մատակարարումն Ադրբեջանին: Հայաստանի հրեաների համայնքի նախագահ Ռիմա Վարժապետյանը նշել է, որ Լեռնային Ղարաբաղում զինված հակամարտության թեժ պահին Իսրայելը շարունակում է Ադրբեջանին մատակարարել նորագույն տեսակի զենքեր: Վարժապետյանը հիշեցրել է, որ սեպտեմբերի 27-ից Լեռնային Ղարաբաղը և Հայաստանը ենթարկվում են կոշտ ագրեսիայի Ադրբեջանի կողմից` Թուրքիայի ակտիվ աջակցությամբ և անմիջական մասնակցությամբ, որը մատակարարում է Ադրբեջանին զենք և ռազմական տեխնիկա, ինչպես նաև հայերի դեմ պատերազմելու համար Սիրիայից հավաքագրում և ուղարկում է ջիհադականների: Հայաստանի հրեաների համայնքի նախագահը շեշտել է, որ Իսրայելի կողմից մատակարարվող զենքն օգտագործում են արմատական իսլամիստները, այն կիրառելով Լեռնային Ղարաբաղի և Հայաստանի խաղաղ բնակիչների դեմ: «Մենք հասկանում ենք Իսրայելի ռազմավարական անվտանգության հարցերը, տնտեսական փոխգործակցության հարցերը և պայմանագրային պարտավորությունների սկզբունքները, սակայն ներկա ճգնաժամային իրավիճակում, երբ զոհվում են խաղաղ բնակիչներ և երեխաներ, չի կարող լինել որևէ արդարացում և բացատրություն: Շատ ցավալի է, որ հենց բազմաչարչար Իսրայելը, որն անդադար պայքարում է իսլամական ահաբեկչության դեմ, զենք է մատակարարում նրանց, ում կողմից կռվում են ջիհադականները: Մենք հույս ունենք, որ Իսրայելը կձեռնարկի բոլոր անհրաժեշտ միջոցները համաշխարհային մասշտաբի աղետը կանխելու համար»,- ասել է Վարժապետյանը:
Արմինե Գրիգորյան
1
2
3
4
5
1
2
3
4
5
3
