Խաղաղության մարտիկների համար պայքարողները սպասում են ԱՀԿ-ի արձագանքին

ՀՀ առողջապահության նախարար Արսեն Թորոսյանը «բաց նամակ» է գրել Առողջապահության համաշխարհային կազմակերպության գլխավոր տնօրեն Թեդրոս Ադհանոմ Ղեբրեյեսուսին, որով արտահայտել է իր մտահոգությունը՝ պայմանավորված Արցախի Հանրապետության (Լեռնային Ղարաբաղ) դեմ Ադրբեջանի ռազմական ոտնձգությամբ:

Նախարարը ԱՀԿ-ի ուշադրությունը հրավիրել է այն բանի վրա, որ ամբողջ աշխարհը հիմա պայքարում է COVID 19 համավարակի դեմ: Նշել է, որ ՄԱԿ-ը կոչ է անում գնալ համընդհանուր հրադարարի և ուժերը կենտրոնացնել՝ պայքարելու համավարակի և դրա սոցիալ-տնտեսական հետևանքների դեմ: «Ադրբեջանի զինված ուժերը ձեռնարկեցին լայնածավալ օդային, հրթիռային և ցամաքային գրոհներ Լեռնային Ղարաբաղի և Ադրբեջանի շփման գծի ողջ երկայնքով՝ թիրախավորելով քաղաքացիական բնակավայրերը, ենթակառուցվածքներն ու դպրոցները, ներառյալ մայրաքաղաք Ստեփանակերտում, ինչի արդյունքում ունենք բազմաթիվ զոհեր և ավերածություններ քաղաքացիական բնակչության շրջանում: Ադրբեջանի ագրեսիան տեղի է ունենում համաշխարհային առողջապահական ճգնաժամի ֆոնին, ինչը խստորեն խոչընդոտում է կորոնավիրուսային հիվանդության ազգային, տարածաշրջանային և համաշխարհային արձագանքման ջանքերին և նպաստում վիրուսի տարածմանը»- գրված է նամակում:

Նախարար Թորոսյանը ներկայացրել է, թե հայկական սպիտակ բանակը՝ բուժանձնակազմը, ինչպես է կատարում իր մասնագիտական պարտքը՝ պաքարելով արդեն երկու ճակատով, որը, երբեմն, նույնիսկ  կյանք է արժենում. «Չնայած քաղաքացիական ենթակառուցվածքների, այդ թվում՝ մարդասիրական և բնապահպանական օբյեկտների անընդհատ ռմբակոծությանը, մեր բժշկական անձնակազմը կատարում է իր պարտականությունները՝ պայքարելով վիրավորների, այդ թվում՝ Ադրբեջանի ռազմական ուժերի կանխամտածված և դիտավորյալ հարձակումների արդյունքում ծանր վիրավորված օտարերկրյա լրագրողների կյանքի ու առողջության համար: Ցավոք, իրենց ծառայությունը կատարելիս մահացու վիրավորվեցին նաև մի շարք բուժաշխատողներ: Հոկտեմբերի 11-ին, երբ հայտարարված էր հրադադար, նույնիսկ այդ ժամանակ Ադրբեջանը թիրախավորել է վիրավոր տեղափոխող շտապօգնության մեքենան»։

Եվ վերջում` հորդոր-խնդրանք մարդու առողջության և բուժօգնության իրավունքը խստագույնս կարևոր կազմակերպությանը. «Մենք հորդորում ենք Առողջապահության համաշխարհային կազմակերպությանը, որը հանդիսանում է COVID-19 համավարակի դեմ պայքարի աշխատանքները համակարգող առաջատար կազմակերպությունը, համապատասխան միջոցներ ձեռնարկել Ադրբեջանի ռազմական ագրեսիայի հետևանքով մարդասիրական աղետը կասեցնելու և COVID-19- ի երկրորդ ալիքի սրումը կանխելու համար»:

Նամակի մեկնաբանություններում նույն կոչով և խնդրանքներով են հանդես գալիս հայ բնակչության մեծամասնութույնը: Խաղաղության համար պայքարող բնակչությունը և խաղաղության մարտիկներին բուժօգնություն ցուցաբերող բուժանձնակազմը վստահ է, որ ԱՀԿ-ն անտարբեր չի լինի:

Աննա Ավետիսյան

Pressmedia.am