Ադրբեջանը քրեական գործ է հարուցել ռուս լրագրողի դեմ. Ի՞նչ հետևանքներ կարող է ունենալ այն

Ադրբեջանի գլխավոր դատախազությունը քրեական գործ է հարուցել ռուս զինթղթակից՝  WarGonzo նախագծի հեղինակ՝ Սեմյոն Պեգովի նկատմամբ, հայտնում է ria.ru-ն։ Սեմյոն Պեգովը Լեռնային Ղարաբաղ է մուտք գործել ՀՀ տարածքից, որը Ադրբեջանի զայրույթի պատճառ է դարձել: Ինչպես հաղորդում է աղբյուրը, Ադրբեջանում Պեգովի դեմ քրեական գործ են հարուցել «ահաբեկչության հրապարակային կոչեր», «պետության դեմ ուղղված հրապարակային կոչեր» և «Ադրբեջանի Հանրապետության պետական սահմանի ապօրինի հատում» հոդվածներով:

Pressmedia.am-ը կապ հաստատեց սահմանադրագետ Վարդան Այվազյանի հետ՝ պարզելու՝ որքանո՞վ, ի՞նչ ազդեցություն կարող է ունենալ այս քրեական գործը ռուս լրագրողի համար՝ հաշվի առնելով, որ մեղադրվողը Ադրբեջանի քաղաքացի չէ: Սահմանադրագետը ասաց, որ Ադրբեջանի համար գագաթնակետը կարող է լինել այն, որ հայտարարվի միջազգային հետախուզում. «Թե անձը, որ երկրի քաղաքացի է, դա բնավ կապ չունի: Պատասխանատվությունը միայն այն դեպքում կլինի, եթե այդ պետությունը կարողանա հասնել նրան, որ ֆիզիկական ազդեցություն ունենա տվյալ լրագրողի վրա: Պետք է փաստեմ, որ սա անհեռանկար երևույթ է: Նման մի գործ իրենք արդեն ունեցել են Լապշինի հետ կապված, երբ կաշառքի միջոցով կարողացան Բելառուսից բերել Ադրբեջան»,- նշեց Վարդան Այվազյանը: Նկատեց նաև, որ հիմա նման երևույթ դժվար թե կրկնվի, քանի որ պատերազմը դարձել է պատճառ, որ այս բոլոր երկրները դատապարտում են Թուրքիայի և Ադրբեջանի ագրեսիան: Ռուսաստանի պարագայում էլ բացառում է, որ հետևանքներ լինեն: Չի կարծում նաև, որ լրագրողը կգնա մի պետութուն, որտեղ նրան կձերբակալեն և կհանձնեն Ադրբեջանին: