Մենք պետք է ամբողջ աշխարհին ցույց տանք, որ 10 մլն-անոց հզոր ազգ ենք
Pressmedia.am կայքի զրուցակիցը քաղաքագետ Արմեն Բաղդասարյանն է։
—Պարոն Բաղդասարյան, ՌԴ նախագահի խոսնակ Պեսկովը հայտարարել է, թե տարածաշրջան խաղաղապահները կարող են մուտք գործել միայն երկու կողմերի համաձայնությամբ: Միեւնույն ժամանակ, թեման լայնորեն քննարկվում է ռուսական պաշտոնական-մեդիա շրջանակներում: Ի՞նչ է սա նշանակում:
— Դա նշանակում է, որ մինչև չլինի երկու կողմերի համաձայնությունը` ռուս խաղաղապահները այստեղ մուտք չեն գործելու, և դա որևէ արդյունք չի տալու։ Ինչո՞ւ չի տալու, որովհետև նախքան ռուս խաղաղապահների մուտք գործելը` պետք է հստակ արձանագրվի, թե ինչ է տեղի ունենում տարածաշրջանում։ Պետք է հստակ արձանագրվի, որ հայկական կողմը ագրեսիայի է ենթարկվել միաժամանակ` Թուրքիայի և Ադրբեջանի կողմից։ Եվ մենք պաշտպանվող կողմ ենք։ Կա հակամարտություն և այս հակամարտության միջնորդները պետք է ֆիքսեն, որ Լեռնային Ղարաբաղը ունի ինքնորոշման իրավունք և այդ թվում` նաև լիակատար անկախության իրավունք, և այդ ամենից հետո միայն իմաստ կունենա ԵԱՀԿ հովանու ներքո խաղաղապահների մուտքը Ղարաբաղ։ Եթե դա տեղի չունենա, ապա խաղաղապահների մուտքը տարածաշրջան ընդհամենը կնշանակի, շատ կարճ ժամանակով և կասկածելի արդյունքներով, ժամանակավորապես կասեցում այս հակամարտության և որ այս հակամարտությունը ցանկացած պահի կարող է վերսկսվել։ Առավել ևս, որ Թուրքիան և Ադրբեջանը պարզապես ցանկանում են ոչնչացնել Հայաստանն ու Արցախը։ Այսինքն, հենց այնպես, առանց միջազգային հանրության լրջագույն քայլերի և առանց հակամարտության իրական գնահատականի` խաղաղապահների մուտքը անիմաստ է և անգամ կարող է վնասել։
— Փարիզում ադրբեջանական գործողությունները դատապարտող ցույցեր են տեղի ունեցել: Նախկին նախագահ Օլանդը պահանջում էր անհապաղ դատապարտել շփման գծում պատերազմական գործողությունները: Ինչպես եք գնահատում ընդհանրապես Ֆրանսիայի արձագանքը և Ֆրանսիան ինչ կարող է անել իրավիճակի վրա ազդելու առումով:
— Ֆրանսիան համաշխարհային լիդերներից մեկն է, մեծ յոթնյակի անդամ և ցանկության դեպքում, իհարկե, շատ բան կարող է անել։ Բայց միայն Ֆրանսիայի ջանքերը, բնականաբար, քիչ են։ Կարծում եմ` ՆԱՏՕ-ն պիտի գնահատական տա, որովհետև Թուրքիան ՆԱՏՕ-ի անդամ է, ԵԱՀԿ-ն պետք է հստակ քաղաքական գնահատական տա՝ պիտի, առնվազն, ֆիքսի Արցախի անկախության իրավունքը, և հետո` հայկական սփյուռքը այս պահին ունի մի կարևոր խնդիր։ Մենք պետք է ամբողջ աշխարհին ցույց տանք, որ Հայաստանը միայն այս 3մլն չենք, որ ապրում ենք Հայաստանում և Արցախում։ Թուրքիան և Ադրբեջանը պետք է հասկանան, որ գործ ունեն 10մլն հայի հետ։ Այս պահին մեր Սփյուռքի առջև դրված է խնդիր՝ նյութապես աջակցել կամ ամբողջ աշխարհով մեկ կազմակերպել բողոքի ակցիաներ, որով մենք հստակ ցույց կտանք, որ մենք 3մլն-անոց փոքր պետություն չենք, այլ 10 մլն-անոց հզոր ժողովուրդ ենք։
Սոնա Ավագյան
1
2
3
4
5
1
2
3
4
1
2
3
5
