Ռազմական օրվա քրոնիկոն

Վաղ առավոտյան պաշտպանության բանակը հայտարարեց, որ արցախաադրբեջանական զորքերի շփման գծի ողջ երկայնքով ռազմական գործողություններ են ընթանում:

Քիչ անց ՊՆ մամուլի խոսնակ Շուշան Ստեփանյանը հայտարարեց. «Հակառակորդը Արցախի ուղղությամբ սկսել է օդային և հրթիռային հարձակում: Ամբողջ պատասխանատվությունը Ադրբեջանի ռազմաքաղաքական ղեկավարության վրա է: Հայկական կողմը խոցել է հակառակորդի երկու ուղղաթիռ և երեք ԱԹՍ: Մարտերը շարունակվում են:»

Ըստ պաշտոնական տեղեկատվության՝ ռազմական գործողությունները սկսվել են վաղ առավոտյան` 07:10-ի սահմաններում:

Գրառումների տեղեկատվության հոսքից առանձնակի աչքի ընկավ գեներալ Ջալալ Հարությունյանը մարտակոչը. « Հաղթանակը հեշտ չի տրվելու: Իր բնույթին հավատարիմ՝ հակառակորդը թիրախավորելու է խաղաղ բնակավայրերն ու քաղաքացիական բնակչությանը, նա տարբերություն չի դնելու զինվորի ու մանկահասակ երեխայի, հոգևորականի ու տարեց կնոջ, հասուն տղամարդու և անօգնական ծերունու միջև. նրա թիրախը բոլորս ենք: Հաղթանակը պահանջելու է ուժերի գերլարում և երկաթակուռ միասնություն:»

Եվ այո', շատ չուշացավ խաղաղ բնակչության դեմ ռազմական գործողությունները: Իր տեսակին հավատարիմ և արդեն ծանոթ` թշնամու գնդակից զոհվեցին մեկ երեխա և մեկ կին: Ավելի ուշ հայտարարվեց խաղաղ բնակչության 6 վիրավորի մասին: Ընդհամենը 1 ժամ անց պաշտպանության նախարար Դավիթ Տոնոյանն արդեն զրույցում էր ԵԱԿՀ գործող նախագահի ներկայացուցչի հետ: «ՀՀ պաշտպանության նախարար Դավիթ Տոնոյանը հեռախոսազրույց է ունեցել ԵԱՀԿ գործող նախագահի անձնական ներկայացուցիչ Անդրեյ Կասպշիկի հետ: Նախարարը ներկայացրել է սահմանին տիրող իրավիճակը և տեղեկացրել, որ Ադրբեջանը սանձազերծել է հերթական սադրանքը:», - ֆեյսբուքյան գրառմամբ հայտնել էր ՊՆ մամուլի քարտուղար Շուշան Ստոփանյանը:

Ամբողջ օրվա ընթացքում իրար էին հաջորդում հակառակորդի տեխնիկական կորուստները փաստող պաշտոնական տվյալները: ՊՆ ներկայացուցիչ Արծրուն Հովհաննիսյանի վերջին հաղորդած տեղեկատվության համաձայն հակառակորդը ունի 4 ուղղաթիռի, 33 տանկի և ՀՄՄ_ի, 27 ԱԹՍ-ի և 2 ինժեներական զրահատեխնիկայի կորուստ:

Օրվա առաջին կեսին ՊՆ կոչ արեց մնալ բնակավայրերում և փողոց դուրս չգալ. «Արցախի խաղաղ բնակչությանը կոչ ենք անում պատսպարվել ու փողոց դուրս չգալ, քանի որ հակառակորդը շարունակում է հրետակոծել քաղաքացիական բնակավայրերը, այդ թվում՝ մայրաքաղաք Ստեփանակերտը»- նշել էր խոսնակը:

Շատ չուշացավ Արցախի նախագահ Արայիկ Հարությունյանի հանդիպումը Արցախի ԱԺ-ի պատգամավորների հետ, որտեղ կոչ արեց խուճապի չմատնվել, բայց ասաց, որ ելույթից հետո Արցախում հայտարարվելու է ռազմական դրություն և սկսվելու զորահավաք:

Մի քանի ժամ անց Արցախի օրինակին հետևեց ՀՀ վարչապետը. հայտարարեց ռազմական դրություն, սկսվեց զորահավաք: Թեև առանց ռազմական դրության էլ վաղ առավոտից հանրապետության հրապարակում կամավորականներ էին հավաքագրված և սպասում էին ՊՆ հրամանին:

Հակառակորդը ընդունեց, որ ունի կորուստներ: ՊՆ-ն էլ եզրակացրեց. «Ադրբեջանի ՊՆ-ն պաշտոնապես հայտարարել է «հակահարձակում» սկսելու մասին, ինչը փաստում է, որ գործողությունները վաղուց պլանավորված են եղել։ Տարրական գիտելիք ունեցող ցանկացած զինվորական կփաստի, որ հակահարձակման օպերացիայի պլանավորումը շաբաթներ է տևում։ Էսկալացիայի մասին պաշտոնական հաղորդագրությունից րոպեներ անց էլ ադրբեջանական և թուրքական լրատվամիջոցներն առաջնագծից նյութեր են հրապարակում, ինչը ևս փաստում է, որ Ադրբեջանի ձեռնարկած սադրանքը նախապես ծրագրված էր»:

Ուշագրավ էր ՊՆ-ի կոչը` ուղղված լրատվամիջոցներին, որով կոչ արվեց չտարածել ապատեղեկատվություն:  Քիչ անց հայտարարվեց` տարբեր լրատվական կայքեր ենթարկվել են հարձակման, նրանց թվում էր նաև պետական լրատվական գործակալությունը: Շատ չանցած նրանց բնականոն աշխատանքը վերականգնվեց:

20:00-ին սահմաններում հաջողվեց ունենալ տեղեկությունների զոհերի և վիրավորների մասին. ունենք 16 զոհ և 100-ից ավելի վիրավորներ, կեսգիշերին էլ հրապարկվեցին զոհերի անունները: Մինչ այդ հայտարարվեց հակառակորդի 200 զոհերի մասին, սակայն պաշտոնական Բաքուն նման տվյալներ այդպես էլ հայտնեց:

Օրվա երկրորդ կեսին համացանցում բազում տեսանյութեր և լուսանկարներ էին հայտնվում, որտեղ կամավորական ջոկատները մեկում են Արցախ` հայրենիքը պաշպանելու և անպայման ետ վարադառնալու պարտադիր պայմանով և հույսով...

Աննա Ավետիսյան

Pressmedia.am