Տարածաշրջանում Հայաստանը Վրաստանի առանցքային դաշնակիցն է.Հակոբ Բադալյան
Pressmedia.am կայքի զրուցակիցը քաղաքագետ Հակոբ Բադալյանն է։
— Պարոն Բադալյան, ինչպե՞ս եք գնահատում այն, որ Ալիևը Վրաստանին շնորհակալություն է հայտնել իր տարածքով Հայաստանին զենք տեղափոխել թույլ չտալու համար։ Որքանո՞վ է Ադրբեջանը փորձում մանիպուլացնել խնդիրը։
— Ադրբեջանը շատ վաղուց և շատ երկար ժամանակ փորձում է օգտագործել բոլոր հնարավոր առիթները, որ Վրաստանին ներքաշի Հայաստանի հետ իր հակամարտության տրամաբանության դաշտ։ Այդ փորձերը նոր չեն, և հիմա հերթական անգամ տեսնում ենք դրանցից մեկը։ Ընդհանուր առմամբ կարող եմ ասել, որ Վրաստանը չի ներքաշվում այդ փորձերի մեջ և, իհարկե, մի շարք հարցերից ելնելով Թբիլիսին չի կարող նաև չաշխատել Բաքվի հետ իր շահերից բխելով, բայց, այդուհանդերձ, Բաքվին չի հաջողվում Հայաստան-Վրաստան հարաբերությունները` ենթարկեցնել իր խնդիրներին։ Չի հաջողվում Վրաստանին ներքաշել այդ տրամաբանության դաշտ և, կարծում եմ, չի հաջողվի, որովհետև այդուհանդերձ վրացական քաղաքական և հասարակական վերնախավը շատ լավ պատկերացնում է, որ Վրաստանը Ադրբեջանի և Թուրքիայի համար նույնքան ռազմավարական թիրախ է, որքան Հայաստանը։ Եվ բնական շահի տեսանկյունից Հայաստանն է Վրաստանի առանցքային դաշնակիցը տարածաշրջանում, չնայած նրան, որ կան հարցեր, որտեղ Հայաստանը և Վրաստանը կարող են ունենալ տարբեր կարծիքներ, բայց, այնուամենայնիվ, կարծում եմ, Վրաստանում այդ խորքային գիտակցումը կա, որ Թուրքիայի և Ադրբեջանի համար Վրաստանը ոչ պակաս թիրախ է, և այստեղ բնական դաշնակիցը դա Հայաստանն է։
— ԵԱՀԿ Մինսկի խմբի համանախագահները հայտարարում են, որ արագ պետք է վերսկսել բանակցությունները, բայց Ադրբեջանը այլ ռազմատենչ հայտարարություններով է հանդես գալիս։ Այս փուլում խնդրի կարգավորման ի՞նչ զրագացումներ են հնարավոր։
— Ես կարծում եմ՝ Ղարաբաղյան հարցում որևէ կարգավորման հեռանկարի մասին խոսելն անիմաստ է։ Ներկայումս համանախագահ երկրները, համանախագահները կարծում եմ, փորձում են ընդհամենը ընդգծել քաղաքական կառավարման հնարավորինս երկարաժամկետ մեխանիզմներ հաշվի առնելով անվտանգային ռիսկերը, որոնք կան և այն շանտաժի քաղաքականությունը, որի աստիճանը մեծացել է Ադրբեջանի հանդեպ Թուրքիայի գերակայության հետևանքով։ Մենք տեսանք, որ Թուրքիան պարզապես կլանել է Ադրբեջանը, և Ադրբեջանը դարձրել է իր քաղաքականության գործիք։ Եվ այստեղ Մինսկի խմբի համանախագահների համար հակամարտության հարցը քաղաքական կառավարման դաշտում պահելն է։ Իհարկե, համանախագահ երկրներից յուրաքանչյուրը՝ Ռուսաստան, Ֆրանսիա, Միացյալ Նահանգներ, ունր իր խնդիրը թե Թուրքիայի հետ, թե առհասարակ, տարածաշրջանային անվտանգության հետ կապված։
Գայանե Մուրադյան
1
2
3
4
5
1
2
3
4
1
2
3
5
