Թրամփը հավանության վարկանիշով «հասնում է» Բայդենին

Հարցումների համաձայն՝ ԱՄՆ-ի նախկին փոխնախագահ Ջո Բայդենը Սպիտակ տան ներկայիս ղեկավար Դոնալդ Թրամփի նկատմամբ պահպանում է իր առավելությունը: Նախագահի ընտրություններին մնում է գրեթե մեկ ամիս, առջևում կան բանավեճեր և էլ ավելի կատաղի պայքար: Սակայն Թրամփին հաջողվել է օգտվել արտաքին հանգամանքներից, և եթե նա շարունակի այդ նույն ուղղությամբ աշխատել, ապա Բայդենի՝ ԱՄՆ նախագահ դառնալու հնարավորությունները մեծ չեն լինի: Այս մասին հաղորդվել է Gazeta-ի հոդվածում, որի հեղինակը Նինո Ջգարկավան է:

The Wall Street Journal-ի և NBC News-ի պատվերով անցկացված նոր հարցման համաձայն՝ ԱՄՆ-ի նախկին փոխնախագահ Ջո Բայդենը՝ Դեմոկրատական կուսակցությունից նախագահի թեկնածուն, պահպանում է իր առավելությունը նախագահ Դոնալդ Թրամփի նկատմամբ: Հարցվածների 51%-ը հայտարարել է, որ քվեարկել է Բայդենի օգտին, մինչդեռ Սպիտակ տան ղեկավարին պատրաստ է աջակցել 43%-ը: Հետազոտությունն անցկացվել է սեպտեմբերի 13-16-ին:

Դեմոկրատական կուսակցության թեկնածուի համար արդյունքները դրական են, սակայն դրանք նաև բացասական միտում են ցույց տալիս: Հիմա Բայդենը Թրամփին գերազանցում է 8%-ով, օգոստոսին նա գերազանցել է 9%-ով, իսկ հուլիսին՝ 11%-ով: Ընդհանուր առմամբ, նախագահի հավանության վարկանիշը կազմում է 45%, ինչը՝ հուլիսի համեմատ, 3%-ով բարձր է:

Առջևում բանավեճեր են, և Սպիտակ տան ղեկավարի աթոռի համար պայքարն ավելի կատաղի է դառնալու: Դոնալդ Թրամփի վերընտրման ծրագրերին խառնվել է կորոնավիրուսի համաճարակը՝ նախագահին զրկելով իր գլխավոր հաղթաթղթից՝ տնտեսական ձեռքբերումներից:

Եթե առաջ Թրամփը կարող էր քարոզարշավը կենտրոնացնել իր տնտեսական հաջողությունների վրա, ապա գարնանը կարևորվել է, թե ինչպես է նա հաղթահարում համաճարակը՝ տնտեսական վնասները նվազեցնելով:

Թրամփը երկար ժամանակ չի համարձակվել զոհաբերել իր ձեռքբերումները՝ հայտարարելով, որ վիրուսը շոգին չի դիմանա և ապրիլին «կմեռնի»: Թրամփն ԱՄՆ-ում արտակարգ դրություն է հայտարարել և եվրոպական երկրների մուտքի 30-օրյա արգելք է մտցրել միայն մարտի 13-ին: Սակայն 10 օր անց նախագահը կորոնավիրուսից «հոգնել է» և հայտարարել, որ պատրաստվում է վերացնել խիստ սահմանափակող միջոցառումները: ԱՄՆ-ն ապրիլի կեսերից աստիճանաբար սկսել է հանել սահմանափակումները: Այնուամենայնիվ, այսպես թե այնպես, Թրամփը կարանտինից դուրս է եկել տնտեսության փլուզմամբ և կորոնավիրուսով հիվանդացության մակարդակով ԱՄՆ-ի առաջին տեղը զբաղեցնելով:

Հարցվածների 48%-ը գտնում է, որ տնտեսության կառավարման համար նախագահն ավելի համապատասխան է, քան Դեմոկրատական կուսակցության թեկնածուն: Այդ հարցման մեջ Բայդենին նախընտրել է քաղաքացիների 38%-ը:

Նախագահը նշել է, որ օգոստոսին ստեղծվել է 1,4 մլն աշխատատեղ, իսկ վերջին չորս ամսում՝ ավելի քան 10,6 մլն:

«Անկասկած, նախկինում երբեք աշխատաշուկան տնտեսական ճգնաժամից հետո այդքան արագ վերականգնում չի ցուցաբերել: Այս տվյալների համեմատ՝ նախորդ վարչակազմը պատասխանատվություն է կրում երկրի պատմության մեջ ամենադանդաղ, թույլ և վատ վերականգնման համար», - ասել է Թրամփը:

Կորոնավիրուսային համաճարակն աստիճանաբար երկրորդ պլան է մղվում. նրան դուրս է մղում տնտեսական ճգնաժամը:

Չինաստանի հետ առճակատման քաղաքականությունը, որը նախագահը վարում է համաճարակի սկսվելուց ի վեր, դրական արդյունքներ է բերել: Որքան շատ էր կորոնավիրուսը տարածվում ԱՄՆ-ում, այնքան Չինաստանի նկատմամբ ավելի կտրուկ հայտարարություններ էր իրեն թույլ տալիս Սպիտակ տան ղեկավարը: Նրա հռետորաբանության հիմքում ընկած էին համաճարակի համար Պեկինին ուղղված մեղադրանքները: Դա վերաբերում էր նաև առևտրային գործարքի երկրորդ փուլի մասին բանակցությունների հեռանկարներին և ԱՀԿ-ում (որին Թրամփը «չինական խամաճիկ» է անվանել), ԱՄՆ-ի ներդրումներին, ինչից հետո դադարեցրել է կազմակերպության ֆինանսավորումը:

Հասկանալով, որ ընտրություններից առաջ ընտրողների համար կառավարությանը միանգամից երկու աղետի՝ տնտեսական փլուզման և համաճարակի պայմաններում անգործության մեջ մեղադրելու առիթ է առաջացել, Սպիտակ տունը գերադասել է մեղադրել Չինաստանին՝ հուսալով, որ արտաքին թշնամու ի հայտ գալը հարվածը կհեռացնի Թրամփից:

Բոլոր փորձանքների մեջ Պեկինին մեղադրելով՝ Թրամփը նաև հասկացել է, որ որքան խիստ դիրք զբաղեցնի Չինաստանի նկատմամբ, այնքան ավելի շատ քաղաքական միավորներ կկարողանա ստանալ: Նրա քննադատությունն արդյունք է տվել: Ընտրողների 46%-ը գտնում է, որ Թրամփն ավելի լավ կարող է հաղթահարել չինական վտանգը, քան Բայդենը: Բայդենին այս հարցում աջակցում է ընտրողների 37%-ը:

Լուսինե Կարապետյան

Pressmedia.am