Սպասենք և տեսնենք, թե նոր կազմով սահմանադրական դատարանը ինչ հրաշքներ է գործելու
Pressmedia.am կայքի զրուցակիցը ԲՀԿ պատգամավոր Գևորգ Պետրոսյանն է։
—Պարոն Պետրոսյան, ԿԳՄՍ նախարար Արայիկ Հարությանի հետ կապված՝ «Լուսավոր Հայաստան» կուսակցությունը հարցապնդում-հրաժարական էր ներկայացրել, բայց իշխանությունը նախարարին պահեց՝ չնայած այն բանին, որ իրենք նույնպես դժգոհություններ ունեն նախարարի աշխատանքից: Սա ի՞նչ է նշանակում:
— Իմ կարծիքով դա նշանակում է այն, որ իրենք հասկանում են, որ եթե իրենցից որևէ մեկին զոհաբերեցին՝ ամբողջ բուրգը փլվելու է, որովհետև իրենք բոլորը նույն կատեգորիայի մարդիկ են։ Եվ, քանի որ իրենք կադրային նորմալ և խոստումնալից բանակ չունեն՝ իրենք ստիպված պահում են։ Ես կոնկրետ Արայիկ Հարությունյանի մեջ ոչ մի դերակցություն չեմ տեսնում ոչ կրթության, ոչ գիտության, ոչ մշակույթի, ոչ էլ սպորտի ոլորտում։
—Բացի Արայիկ Հարությունյանի հրաժարականից, ԲՀԿ-ն օրակարգում ունի՞ այլ նախարարների կամ կառավարության 100 տոկոս հրաժարականի պահանջ:
— ԲՀԿ-ն արդեն ի դեմս պարոն Ծառուկյանի հայտարարել է իշխանության 100% -անոց հրաժարականի պահանջ, և մենք որևէ տարանջատում չենք դնում նախարարներից որևէ մեկի միջև։ Իհարկե, կան նախարարներ, որոնք լավ են աշխատում, մասնավորապես ՊՆ նախարարը, բայց մենք որևէ տարանջատում չենք կարող դնել, մենք պահանջում ենք 100%-անոց հրաժարական։ Այսօր հասարակական կյանքի բոլոր ոլորտներում, բացի պաշտպանությունից, իրենք ձախողվել են, այդ պատճառով իշխանությունը պետք է ամբողջ կազմով հրաժարական տա։ Այդտեղ մարդիկ են, ովքեր հասարակության կողմից չեն ճանաչվել, նրանցից որևէ մեկը թող հրապարակի գիտական աշխատություններ, կամ ներկայացնի իր կենսագրությունը և տեսեք, թե այդ մարդիկ ինչ կապ ունեն իրենց զբաղեցրած պաշտոնների հետ։ Այդ պատճառով մենք ամբողջ կազմի հրաժարականն ենք պահանջում, և եթե կան մարդիկ, ովքեր հետագայում կհետաքրքրեն, իրենք կարող են վերանշանակվել։
— Սահմանադրական դատարանի շուրջ ճգնաժամը կարծես լուծվել է: Դուք եւս այդպե՞ս եք կարծում:
— Սահմանադրական դատարանի շուրջ որևէ ճգնաժամ չկար, այդ ամենը իրենք ստեղծեցին, և հիմա կարծես թե փորձում են ուղղել իրենց սխալները։ Բայց, այնուամենայնիվ, ԲՀԿ-ն չի մասնակցել որևէ գործընթացի այն պատճառով, որ մենք ի սկզբանե Սահմանադրական դատարանի ապօրինի քանդումը համարել ենք ոչ իրավաչափ գործընթաց, հետևաբար տրամաբանական չէր այն, որ մենք մասնակցեինք վերջին թեկնածուների ընտրությանը։ Ամեն դեպքում ճգնաժամը ստեղծեցին իրենք և հիմա, եթե իրենք գտնում են, որ այդ ճգնաժամը հաղթահարված է` սպասենք և տեսնենք, թե ինչպես է Սահմանադրական դատարանը անցնելու իր բնականոն աշխատանքին։ Նաև կա վտանգ, որ Սահմանադրական դատարանի այն անդամները, ում փոխարեն որ ընտրվեցին վերջին թեկնածուները, նրանք կարող են իրենց աշխատանքային իրավունքների խախտումը վիճարկել և չգիտենք, թե այդ դեպքում ինչ է սպասվում մեր Սահմանադրական դատարանի գործընթացին։ Սպասենք և տեսնենք, թե նոր կազմով սահմանադրական դատարանը ինչ հրաշքներ է գործելու։
Նառա Տիգրանյան
1
2
3
4
5
1
2
3
4
5
1
2
3
4
5
