COVID-19 կորոնավիրուսի առաջին ախտանիշները

Նոր կորոնավիրուսն ազդում է ողջ աշխարհի բնակչության, այդ թվում նաև՝ Կալիֆորնիայի բազմաթիվ ընտանիքների վրա, քանի որ վիրուսը շարունակում է ի հայտ գալ ավելի ու ավելի շատ համայնքներում: Children’s Hospital Los Angeles-ը ջանադրաբար աշխատում է մեր հիվանդներին, ընտանիքներին և անձնակազմի անդամներին պաշտպանելու ուղղությամբ:

Մենք մեր մասնագետներին խնդրել ենք որոշ փաստեր ներկայացնել, որոնք կօգնեն պատասխանելու այն հիմնական հարցերին, որ ծնողները կարող են ունենալ: Ստորև բերված են տեղեկություններ այս վիրուսի մասին, ինչ է արվում դրա հետագա տարածումը կանխելու համար, և ինչպես կարող եք պաշտպանվել վարակի սպառնալիքից:

Ի՞նչ են կորոնավիրուսները:

Կորոնավիրուսները վիրուսների մի մեծ խումբ են, որոնք կարող են վարակել թե՛ կենդանիներին և թե՛ մարդկանց՝ առաջացնելով շնչառական հիվանդություններ՝ սկսած այնպիսի մեղմ դրսևորումներից, ինչպիսին է սովորական մրսածությունը, մինչև ծանր ձևեր, օրինակ՝ թոքաբորբ: Հազվադեպ է պատահում, որ կենդանիների կորոնավիրուսները վարակեն մարդկանց, և այնուհետև տարածվեն նրանց շրջանում: Միգուցե հիշում եք 2002-2003 թվականների SARS (սուր ծանր շնչառական համախտանիշ) հիվանդությունը, որը նույնպես կորոնավիրուս էր, որը կենդանիներից անցել էր մարդկանց: Կորոնավիրուսի մեկ այլ հանրահայտ, վերջերս ի հայտ եկած շտամներից էր MERS-ը (Մերձավոր Արևելքի շնչառական համախտանիշ), որն առաջացավ 2012թ.-ին Մերձավոր Արևելքում և, ըստ գիտնականների, նախապես մարդուն էր անցել ուղտից։

Ես տեսել եմ թեստի արդյունք, որում նշված է «կորոնավիրուս»: Դրանից պե՞տք է անհանգստանամ։

Պարտադիր չէ։ Կորոնավիրուսի ախտորոշումների ճնշող մեծամասնությունը համարժեք է նրան, ինչ ձեզ ասեին, որ ունեք սովորական մրսածություն կամ գրիպ։ Նկատի ունեցեք, որ «կորոնավիրուս» տերմինը ներառում է վիրուսների մի ամբողջ ընտանիք: Կորոնավիրուսի թեստի դրական արդյունքը չպետք է խուճապի պատճառ դառնա։ Այս փաստը կարող է շատ շփոթեցնող լինել, ուստի համագործակցեք ձեր բժշկի կամ բուժող անձնակազմի հետ, եթե նկատել եք այդ բառը։

Ինչպե՞ս է տարածվում կորոնավիրուսը:

Մարդկանց միջև վիրուսը սովորաբար տարածվում է հազալու և փռշտալու միջոցով, վարակված անձի հետ անմիջական շփման կամ վարակված մակերեսին ձեռք տալու, այնուհետև բերանին, քթին կամ աչքերին դիպչելու միջոցով:

Ինչպե՞ս կարող են մարդիկ օգնել հիվանդության տարածումը կանխելուն:

Հիվանդությունների վերահսկման և կանխարգելման կենտրոնը (CDC) խորհուրդ է տալիս հետևել հիգիենայի ճիշտ կանոններին, այդ թվում՝ հաճախ լվանալ ձեռքերը, լինել հիդրատացված, հազալ արմունկի անկյունում կամ անձեռոցիկի մեջ և մնալ տանը, եթե վատ եք զգում։ Բացի այդ, նույնիսկ եթե հիվանդ չեք, խորհուրդ ենք տալիս տանը մնալ, եթե խիստ անհրաժեշտ չէ դուրս գալը, և պահպանել սոցիալական հեռավորություն (այլ անձանցից առնվազն վեց ոտնաչափ հեռավորություն)։

Որո՞նք են նոր կորոնավիրուս հիվանդության (COVID-19) ախտանշանները։

CDC-ն հայտնում է նոր կորոնավիրուսի հետևյալ ախտանշանները՝ «ջերմություն և ստորին շնչառական ուղիների հիվանդության ախտանշաններ (օր․՝ հազ, շնչառության դժվարացում)»: Խուսափեք այն անձի հետ շփումից, ում մոտ կասկածվում է վիրուսի առկայություն։

COVID-19-ը բուժելի՞ է։

Հիվանդության պատվաստանյութ չկա, և քանի որ այն վիրուս է, հակաբիոտիկները արդյունավետ չեն։ Քանի որ չկա որևէ կոնկրետ բուժում, բուժաշխատողները հիմնականում բուժում են ախտանշանները և օգնում, որ հիվանդն իրեն ավելի լավ գզա։