Կամերայինը ճանապարհ է հարթում երիտասարդ կատարողների համար
ՀասարակությունԿամերային երաժշտության ազգային կենտրոնը հանդես է գալիս նոր նախաձեռնությամբ՝ նպաստելով երիտասարդ կատարողների ինքնաարտահայտմանը:
«Ճանապարհ երիտասարդներին» ծրագրի շրջանակներում Կամերիայինում ամիսը մեկ անգամ համերգներ կկազմակերպվեն, ինչի ընթացքում հանդես կգան երիտասարդ երաժիշտները:
«Ծրագրի նպատակը հետևյալն է. հնարավորինս խթանել երտասարդ կատարողներին, նրանց համար ճանապարհ հարթել ու հնարավորություն տալ ներկայանալ արդեն իսկ որոշակի ճանապարհ անցած երաժիշտների ու ստեղծագործական խմբերի հետ»,- ասաց Կամերային երաժշտության ազգային կենտրոնի տնօրեն Վաչե Հովեյանը՝ ներկայացնելով այն երեք երաժիշտներին, որոնք պետք է ելույթ ունեն «Ճանապարհ երիտասրադներին» ծրագրի անդրանիկ համերգի ժամանակ:
Նրանցից Արուսյակ Դավթյանը, ով Երևանի պետական կոնսերվատորիայի որակավորման բարձրագույն կուրսերի ուսանող է, լրագրողների հետ զրույցում ասաց, որ այս նախագիծը մեծ դեր է խաղում երիտասարդ երաժիշտների կարիերայի առաջընթացի հարցում: Իսկ ջութակահար Անի Բալյանը, ով Կոնսերվատորիայի երրորդ կուրսի ուսանող է, նպաստում է մասնագիտական գիտելիքների լիարժեք զարգացմանը:
«Մեծ պատիվ է այս փառատոնի բացմանը նվագել: Ուզում եմ բոլորիս անունից շնորհակալություն հայտնել, որ մեզ դահլիճ է տրամադրվել ու հնարավորություն ընձեռնվել ներկայանալու, հանդես գալու: Մեզ մնում է միայն լավ պարապել ու լավ ներկայացնել մեր ունակությունները»,- ասաց համերգի մյուս մասնակից, ԵՊԿ 3-րդ կուրսի ուսանող, ջութակահար Էդմոնդ Հովհաննիսյանը, որի համար «Ճանապարհ երիտասարդներին» ծրագրի առաջին մասնակիցը լինելն անակնկալ է եղել, բայց, միևնույն ժամանակ, պատրավորեցնող ու պատվաբեր:
Լրագրողների հարցին, թե վերոնշյալ ծրագրին մոտավոր քանի՞ երիտասարդ կմասնակցի, ու ի՞նչ սկզբունքով պետք է ընտրվեն նրանք, Հովեյանը պատասխանեց, որ եթե ամեն մի համերգի մասնակցեն երեք երաժիշտ, ապա տասը համերգի դեպքում 30 մասնակից կունենան՝ չհաշված այդ մասնակիցներին նվագակցող դաշնակահարներին ու հրավիրյալ երաժիշտներին:
Անդրադառնալով ծրագրի մասնակիցների ընտրությանը՝ կենտրոնի տնօրենն ասաց, որ ինքն անձամբ դասավանդում է Կոնսերվատորիայում ու գիտի այնտեղ ուսանող երիտասարդներին, բացի այդ՝ խորհրդակացում է Կոնսերվատորիայի ռեկտորի, տարբեր ֆակուլտետների դեկանների, Չայկովսկու դպրոցի, Բաբաջանյանի ու Ռոմանոս Մելիքյանի երաժշտական քոլեջների տնօրենների հետ:
«Մենք բաց ենք ցանկացած համագործակցության համար, ու եթե ծրագրին մասնակցել ցանկացող այլ երիտասարդներ կլինեն, ապա մենք կհայտարարենք ներքին մրցույթ ու նրանց նույնպես հարթակ կտրամադրենք»,- ընդգծեց Վաչե Հովեյանը:
Կամերային երաժշտության ազգային կենտրոնի փոխտնօրեն Աննա Ճուղուրյանն էլ ավելացրեց, որ երիտասարդները հնարավորություն կունենան Կամերայինի տարբեր երաժշտախմբերի հետ հանդես գալու: Բացի այդ՝ «Ճանապարհ երիտասարդներին» ծրագրի շրջանակներում, փոխտնօրենի փոխանցմամբ, բաց դասեր են կազմակերպվելու, վարպետության դասեր են լինելու՝ համաշխարհային հայտնի կատարողների մասնակցությամբ:
Սևակ Վարդումյան