Կենտրոն վարչական շրջանը լիկբեզի կարիք ունի
BlogԿարինե Գասպարյանը ֆեյսբուքյան իր էջում գրում է .
Երբ տարրական մաթեմատիկական գիտելիքներին չի տիրապետում շարքային քաղաքացին, դա ոչ ցանկալի, բայց, համենայն դեպս, ուրիշ քաղաքացիների համար ոչ այնքան վտանգավոր երևույթ է, քանի որ շարքային քաղաքացու անգրագետ գործողություններից, որպես կանոն, տուժում է միայն ինքը։
Բայց երբ տարրական գիտելիքներին չի տիրապետում Կենտրոն վարչական շրջանի աշխատակիցը, դա արդեն լուրջ հարց է, քանի որ նրա անգրագիտորեն կայացրած որոշումները կարող են վնասել այլ քաղաքցիների, ընկերությունների, կազմակերպությունների։ Վերջերս հենց վերոնշյալի տիպիկ օրինակն էր «Մուլտի Գրուպ» ընկերության հետ կատարված դեպքը, որը Կենտրոն վարչական շրջանի աշխատակիցների անգրագիտության դրսևորումներից էր։ Այլ կերպ հնարավոր չէ բնութագրել այդ դեպքը։
Իսկ խնդիրը հետևյալում էր․ Կենտրոն վարչական շրջանը դատական հայց է ներկայացրել «Մուլտի Գրուպ» կազմակերպության դեմ՝ աղբահանության վճարը չվճարելու համար։ Սակայն երբ ծանոթանում ենք փաստերին, պարզվում է, որ աղբահանության վճարը հաշվարկվել է ամենակոպիտ սխալներով, մասնավորապես, սպորտային համալիրի աղբահանության վճարը հաշվարկվել է հանրային սննդի համար նախատեսված աղբահանության վճարի գործակցով։ Արդյունքում ստացվել է տասնյակ անգամ մեծ գումար, որը, սակայն, սխալ գումար է, քանի որ ոչ մի կապ չունի սպարտային կոմպլեքսի հետ։ Հենց այս սխալ հաշվարկված գումարն է ցանկացել գանձել «Մուլտի Գրուպ» ընկերությունից Կենտրոն վարչական շրջանը, չփորձելով անգամ պարզել, արդյո՞ք նշված գումարը համապատսխանում է օրենքով սահմանված չափորոշիչներին, թե ոչ։
Գործը արդեն հայտնվել է դատարանում և հենց դատարանում է Կենտրոն վարչական շրջանը նկատելու իր խայտառակ սխալը։ Իսկ մինչ այդ ապօրինի պահանջներով դատարան դիմած Կենտրոն վարչական շրջանը զլանում է անգամ օրենքով սահմանված իր պարտականությունները պատշաճ կատարել։ Այսօր բավական է կարճ ժամանակ շրջել Կենտրոնի փողոցներով և անմիջապես կտեսնենք, որ աղբահանության ապօրինի վճարներ գանձելու համար «կաշվից դուրս եկող» Կենտրոն վարչական շրջանը անգամ իր վարչական տարածքում տարրական աղբահանություն չի կարողանում իրականացնել։
Սա իրականում խայտառակություն է․ մի կողմից իր պարտականությունները պատշաճ կերպով չկատարող վարչական շրջանի ղեկավարություն, մյուս կողմից տարրական մաթեմատիկական գիտելիքներից զուրկ աշխատակիցներ․ արդյունքում ստացվում է այսպիսի իրավիճակ, երբ արատովորվում է «Մուլտի Գրուպ» ընկերության բարի համբավը։ Թերևս Կենտրոն վարչական շրջանը իր աշխատակիցներին պետք է ուղարկի դպրոց լիկբեզի և վերապատրաստման համար, որպեսզի հետայսու կարողանան հանրային սննդի վայրերը տարբերել սպորտային համալիրից։