Նռան օգտակար հատկությունները, օգտագործման եղանակներն ու հակացուցումները
TVՆռան օգտակար հատկությունները
Իր բաղադրության մեջ պարունակվող օգտակար նյութերի, հանքանյութերի ու վիտամինների քանակով նուռն աշխարհում եզակի միրգ է: Այն հարուստ է ամբողջ օրգանիզմի աշխատանքը կարգավորող C, B, P վիտամիններով, յոդի, կալիումի, սիլիցիումի և երկաթի աղերով, ինչպես նաև՝ 15 տարբեր ամինաթթվով:
Նռան հյութը բժիշկները խորհուրդ են տալիս խմել վիրահատություններից, վարակներից, ստամոքսի խանգարումից և անեմիայից՝ սակավարյունությունից հետո: Այն պարունակում է հակաբորբոքային նյութեր, որոնք շատ օգտակար են կոկորդի հիվանդությունների, ստոմատիտի և այրվածքների դեպքում:
Այս մթերքը նաև շատ օգտակար է կոլիտների, էնտերոկոլիտների և փորլուծության ժամանակ, իսկ շաքարային դիաբետով տառապողներն այս հյութի օգնությամբ կարող են իջեցնել օրգանիզմում պարունակվող գլյուկոզայի մակարդակը:
Նռան յուղ
Նռան սերմերից ստացած այս յուղը պարունակում է մեծ քանակությամբ օգտակար նյութեր, այդ թվում նաև վիտամին E:
Այն կանխում է մաշկի վաղաժամ ծերացումը: Բացի այդ, այն շատ հարմար է մաշկը խոնավեցնելու և խոնավությունը պահպանելու համար: Այն դանդաղեցնում է ծերացումը, ուստի օգտագործվում է կնճիռների վերացման համար: Հաշվի առնելով այն փաստը, որ նռան յուղը մասնակցում է կոլլագենի սինթեզին՝ կարելի է ասել, որ այն նպաստում է մաշկի երիտասարդության ու առաձգականության պահպանմանը:
Նռան յուղն օգտագործվում է նաև մաշկի բորբոքումների ժամանակ (էկզեմա կամ ակնե) և հիանալի արևապաշտպան միջոց է:
Բուժում նռան միջոցով
Նուռը շատ վաղուց օգտագործվում է ժողովրդական բժշկության մեջ թուրմերի ու եփուկների տեսքով: Ավիտամինոզի դեպքում խորհուրդ է տրվում ուտել նռան թարմ պտուղները: Այն նաև շատ օգտակար է փորլուծության դեպքում, իսկ նռան կեղևի փոշին կօգնի շատ արագ բուժել մաշկի ճաքերը:
Նռան կեղևի թուրմը հիանալի դեղամիջոց է հելմինտոզի բուժման համար: հարկավոր է 50 գրամ հումքին ավելացնել 500 մլ գոլ ջուր, 6 ժամ թրմել, այնուհետև դնել կրակին և եփել, մինչև կաթսայում մնա 200 մլ թուրմ: Թուրմը վերցնել կրակից, քամել և ընդունել 1 բաժակը մեկ ժամվա ընթացքում: Թուրմը խմելուց կես ժամ անց անհրաժեշտ է լուծողական միջոց ընդունել:
Նշիկաբորբի կամ ստոմատիտի դեպքում շատ արդյունավետ է նռան կեղևի լուծույթը, որի պատրաստման համար անհրաժեշտ է 20 գրամ նռան կեղևի փոշուն ավելացնել 200 մլ եռման ջուր և կես ժամով դնել կրակին: Պատրաստի թուրմը քամել և աստիճանաբար ավելացնել այնքան եռման ջուր, որքան հարկավոր է, որ թուրմը դառնա իր նախնական քանակության (200 մլ): Այս լուծույթով հարկավոր է օրական 5 անգամ ողողել բերանն ու կոկորդը:
Երեխաների համար դիզենտերիայի դեպքում նռան եփուկը նույնպես կարող է շատ օգտակար լինել: Հարկավոր է 5 գրամ թարմ նռան կեղևին ավելացնել 100 մլ եռման ջուր և 10 րոպեով դնել կրակին: Պատրաստի թուրմը երեխան պետք է ընդունի օրական 3 անգամ՝ մեկ կամ նույնիսկ երկու թեյի գդալ:
Մաշկի բորբոքումների ժամանակ կարելի է օգտագործել նռան ծաղիկների թուրմը: 10 հատ ծաղկին անհրաժեշտ է ավելացնել 200 մլ եռման ջուր և կես ժամ թրմել: Թուրմը հարկավոր է օգտագործել տաք վիճակում: Անհրաժեշտ է թրջել դրա մեջ բամբակը, դնել այն ախտահարված հատվածին, այնուհետև ծածկել կոմպրեսային թղթով և տաք վիրակապով: Կոմպրեսը հարկավոր է թողնել 20 րոպե:
Հակացուցումներ
Նռան թարմ քամած հյութը մաքուր վիճակում չի կարելի խմել, քանի որ այն կարող է դառնալ ստամոքսի լորձաթաղանթի բորբոքման պատճառ: Հյութին հարկավոր է ջուր խառնել և խմել այն դանդաղ, ձողիկի միջոցով: Նռան եփուկների և թուրմերի չարաշահումը կարող է հանգեցնել զարկերակային ճնշման բարձրացման: Առհասարակ նռան գործածությունը չարաշահելու դեպքում կարող են առաջանալ ջղաձգումներ, թուլություն ու գլխապտույտներ և նույնիսկ վատանալ տեսողությունը:
Հեպատիտի և ստամոքսի խոցային հիվանդության ժամանակ նուռն անշուշտ հակացուցված է:
Նյութի աղբյուրը՝ ayzdorov.ru