Ֆեյսբուքյան «լյուստրացիաներ» կամ անբովանդակ գաղջի շրջապտույտում
ՎերլուծությունՀայաստանյան սոցցանցերում և մեդիայում ամենաշատ քննարկվող թեմաներից են ․․․ պարապ թեմաները։ Հարցեր, որոնք արժանանում են բուռն արձագանքների, քննադատությունների, գովեստի պարսավանքի, սական ըստ էության, այս ամենով հանդերձ բովանդակություն չեն ձեռք բերում, չեն էլ կարող։
Հենց այսպիսի անբովանդակ թեմաներից մեկն ասենք վաստակավոր արտիստի կոչում ստացած-չստացածների քննարկումն է։ Յուրաքանչյուր նման կոչումների բաշխումներից հետո մի քանի որ շարունակ հայաստանյան մեդիամիջավայրը բաժանվում է մի քանի բանակի, ընդ որում՝ միմյանց դեմ կատաղի պայքարող բանակների։ Ովքեր են ստացել, ինչ ծառայությունների համար արժանի էին արժանի չէին և այլն։ Արդյուքնը սակայն լինում է ոչ մի բան, որովհետև չի կարող արդյուքն ունենալ դատարկաբանությունը։
Ոչ պակաս պարապ թեմաներից են քաղաքական բամբասկոտությունները։ Վերջիններիցս երևի ամենաթարմը վերաբերում է Արմեն Աշոտյանի և Մանե Թանդիլյանի այցելությունը։ Հայաստանի պատվիրակները նկար էին հրապարակել, որտեղ արտառոց ոչինչ չկար։ Բայց պարզվում է, որ հայաստանյան սոցցանցերի համար դա բավական էր Թանդիլյանին «լյուստրացիայի» ենթարկելու համար։
«Ահաաա, փաստորեն երկրում ընդդիմադիր են խաղում, գնում են Բաքվում իրար հետ շամպայն խմում»։ Այս մակարդակի զրույցներով էր լցված հայկական ֆեյսբուքը։ Որևէ մեկի մտքով բնականաբար չէր էլ անցում, թե ինչի համար էին Աշոտյանն ու Թանդիլյանը գնացել Բաքու, ինչ է «Եվրանեսթը», ինչ ժողով է անում, չէ այդ ամենը չորրորդական հարցեր են, կարևորը որ իշխանությունն ու ընդդիմությունը շամպայն են խմում։ Չնայած հանուն արդարության պետք է ասենք, որ ներկայիս ընդդիմության, եթե այն կա ընդհանրապես մեծ մասը բացահայտ կամ թաքուն, միշտ էլ շամպայն կամ այլ խմիչքներ խմել է իշխանության հետ։ Սակայն դա այլ հարց։
Այս բոլոր քննարկումներում այդպես էլ որևէ մեկի մտքով չի անցնում, թե ում հետ պետք է լինեին հայկական պատվիրակները, եթե ոչ իրար։
Ոչ պակաս պարապ ու անբովանդակ թեմաներից է Սերժ Սարգսյանի վարչապետի կամ որևէ այլ քաղաքական գործի մասնակցությամբ քեֆ ուրախությունների քննարկումը, առավել ևս երբ խոսքը գնում է Սերժ Սարգսյանի պարելու մասին։ Երբեմն նման թեմաներ արծարածողները տպավորություն են ստեղծում, որ թե Սերժ Սարգսյանը կամ ուշադրության տակ հայտնված պաշտոնյան գերբնական մի էակ է, ով չի կարող պարել, սնվել անել հասարակ մահկանացուներն հատուկ բոլոր բաները։
Ինչևէ այս շարքը շատ երկար կարող ենք շարունակել, սակայն որպեսզի խուսափենք հերթական պարապ մտքերն արտահայտելուց, ապա եզրաբակենք նշելով, որ ցանկալի կլիներ, յուրաքանչյուրս մեր ֆեյսբուքի էջում, կամ որևէ այլ տեղ գրառում կատարելուց առաջ մի պահ մտածեինք՝ արդյոք արժե՞։
Արշակ Սարգսյան