Սեֆիլյանը «մոռացել է» նշել վարչապետի անունը
ՎերլուծությունՀետաքրքիր ամպեր են կուտակված Հայոց երկնակամարում։ Մեկ Կրթության գիտության նախարարությունը ռուսաց լեզվի դասավանդման հայեցակարգ է մշակում՝ հղում անելով վարչապետի հանձնարարականին, վարչապետն իր հերթին ժխտում է նման հանձնարարականը, այնուհետև ԿԳՆ պարզաբանում է, որ խոսքը բոլորվին էլ չի գնում ռուսերենին արտոնյալ կարգավիճակ տալու մասին, այլ ընդամենն ուսուցման հայեցակարգի։ Շեշտվում է նաև, որ նման հայեցակարգեր մշակվել են գերմաներենի, անգլերենի և ֆրանսերենի պարագաներում։ Մի քանի օր շարունակվող այս թնջուկին հանկարծ, որտեղից որտեղ միանում է Ժիրայր Սեֆիլյանը կալանավայրից՝ կոչ անելով Փաշինյանին, Վարդան Օսկանյանին, Սեյրան Օհանյանին և մի շարք այլ գործիչների միասնական ճակատ ձևավորել՝ դե պարզ է երկրի փրկության համար։
Այստեղ անշուշտ դուք կհարցնեք, թե ինչ կապ կարող են ունենալ ռուսերենի դասավանդման հայեցակարգն ու Սեֆիլյանի ուղերձները, սակայն երբ մի փոքր քննության առնենք դեպքերի հաջորդականությունը, ապա այդ կապն առավել քան ակնհայտ կդառնա։
Բանն այն է, որ ռուսաց լեզվի դասավանդման հայեցակարգի մասին լուրերը արագորեն հանդիպեցին ռուսական իմպերիալիզմի դեմ պայքարիստների արյունարբու դիմադրությանը։ Ընդ որում պետք է նշել, որ որպես կանոն քննադատությամբ հանդես եկողներից շատերը ծանոթ չէին ոչ հայեցակարգին, ոչ էլ նրա բովանդակությանը։ Ավելին այդ բովանդակություննն ըստ էության նրանց հետաքրքիր էլ չէր, քանի որ կարևորը թեմա լիներ հերթական հակառուսական ալիքի համար։ Արդյունքում ինչ է ստացվում՝ փաստացի Կարապետյանը հրապարակային կերպով հրաժարվելով նման հանձնարարականից ուղղակիորեն ակնարկում է, որ այդ հանձնարարականը այլ տեղից է գալիս՝ մոտավորապես Բաղրամյան փողոցից։ Այս ակնարկը ավելի հստակ է դառնում 2018 թվականին հավանական վարչապետացուների քննարկումների ֆոնին։ Այլ կերպ ասած հակառուսական տրամադրություններն ուղղորդվում են դեպի Սերժ Սարգսյան։
Ու հանկարծ այս խառնաշփոթում ասպարեզում է հայտնվում Սեֆիլյանի հերթական ուղերձը՝ ազգի փրկության կոչերով՝ ընդ որում ուղերձում առկա անվանացանկը շատ հետաքրքիր է՝ առնվազն ռուսամետ ընկալվող գործիչների ցանկով։
Այստեղ անշուշտ, ավելի ազնիվ կլիներ, եթե Սեֆիլյանի կազմած անվանացանկում չբացակայեր նաև Կարեն Կարապետյանի անունը, որը կարծես թե անգամ ընդդիմադիր հանդես եկող մի շարք ակտիվ պատգամավորների համար ընդունելի վարչապետացու է։
Արդյունքում գալիս ենք մի հանգրվանի՝ Կարեն Կարապետյանը կամ ավելի ճիշտ կլինի ասել նրա հետևում կանգնած հայտնի «գազային ուժերը» սկսել են իրենց մեծ խաղը ՝ Ծռերով, ընդդիմադիրներով ու որքան էլ տարօրինակ է՝ արտաքուստ հակառուսական, սակայն բովանդակության մեջ հենց ռուսական ուժերի ձեռքին գործիք հանդիսացող տարատեսակ ակտիվիստներով հանդերձ։
Սիմոն Գալստյան