Իսրայել-Հայաստան առեւտրային պալատն ուզում է «Շիրակ» օդանավակայանի մոտ լոգիստիկ կենտրոն ստեղծել
ՄիջազգայինՀՀ կառավարությանն առընթեր քաղաքացիական ավիացիայի գլխավոր վարչության պետ Սերգեյ Ավետիսյանն ընդունել է Իսրայել -Հայաստան առեւտրային պալատի նախագահ Ցվի Կան-Տորիի գլխավորած պատվիրակությանը:
ՔԱԳՎ-ից NEWS.am-ին հայտնում են, որ առեւտրային պալատի ներկայացուցիչները ՔԱԳՎ պետին ներկայացրել են Գյումրիի «Շիրակ» օդանավակայանի հարակից տարածքում լոգիստիկ կենտրոնի ստեղծման մտադրությունը, ձեռնարկած քայլերը եւ անհրաժեշտ միջոցառումների շարքը:
ՔԱԳՎ պետը, ողջունելով Պալատի ներկայացուցիչների կողմից ձեռնարկած ծրագիրը, ներկայացրել է «Շիրակ» օդանավակայանի հնարավոր պոտենցիալը՝ իր պատրաստակամությունը հայտնելով կենտրոնի ստեղծմանն աջակցելուն:
Հանդիպման ընթացքում անդրադարձել են նաեւ Իսրայելից դեպի Հայաստան իրականացվող չվերթներին՝ քննարկելով նաեւ իսրայելական ավիաընկերությունների կողմից թռիչքների իրականացման հնարավորությունը:
Հիշեցնենք՝ «Ավիակոմպանիա Արմենիա» ավիաընկերությունը Երեւան-Թել Ավիվ-Երեւան երթուղին սկսել է շահագործել 2017 թվականի մայիսի 17-ից՝ շաբաթական երկու չվերթ հաճախականությամբ` հինգշաբթի եւ կիրակի օրերին: